Myen Hpyen Dap Sanghpaw Gaw Tigyaing Ginra De Du Nga Sai Majaw Hka Mayan Shanu Nga Ai Ni Koi Yen Na Matu BPDF Tsun Sadi Jaw Ai Lam

Pajau Media

23 July, 2025

Myen dap a Hpyen garum Sanghpaw gaw Tigyaing ginra de du nga sai re majaw Manmaw ginra kata na Mali hka mayan shanu nga ai Mung masha ni hkyak hkyak koi yen ai lam galaw na matu Manmaw ginra Mung shawa makawp maga hpung ni kawn n dau da ai re hpe chye lu ai.

Myen hpyen dap Sanghpaw hpung ni lung wa sai re majaw ntsa lam Hka lam dingyang mung gasat gala majan byin wa mai majaw Mung masha ni hkyak hkyak koi yen na matu hkawm sa hkawm wa lam ni hte poi shingra galaw ai lam, masha hpawng chyawm ai lam ni n galaw na matu tsun n dau ai re.

Dai sha n-ga Hpyen Sanghpaw ni yawng hkoi tsai mat ai aten hta she tinang dum nta buga de wa nga na matu tsun da ai re. Lai wa sai shani hta mung Tigyaing Muklum de du nga ai Myen hpyen dap Sanghpaw hpung ni gaw lahta de lung wa dingyang re lam chye lu ai.

Dai Sanghpaw Hpung ni gaw lai wa sai July 17 ya shani kaw nna Mandalay Muklum Sanghpaw daru kaw nna Jinghpaw Mung ginra de lung wa ai re hpe mung chye lu ai.

Shiga- Htu Seng