Myen Hpyen Dap Sanghpaw Ni Gaw Jinghpaw Mungdaw De Matut Manoi Lung Wa Ai Lam

Pajau Media

July 25.2025

Sagaing ginra Hti Chyai kaw du nga ai Myen hpyen dap Sanghpaw hpung ni gaw July 25 ya jahpawt daw kaw nna Katha lahta maga de matut manoi lung wa ai re lam ni nawn ai ginra masha ni tsun ai kaw na chye lu ai.

“ Hti Chyaik kaw hkring nna laknak n kau hpe wa jahkrat kau da ai, ngut na dai hpawt daw Katha lahta de matut manoi lung wa sai” nga nna ni nawn ai ginra masha tsun ai.

Mandalay Sanghpaw Daru kaw nna dingyang lung wa ai Myen hpyen dap Sanghpaw hpung ni gaw July 24 ya shani Hti Chyaik kaw wa du nna lak nak hte malu masha wa jahkrat kau da ai hpang matut manoi lung wa ai re lam chye lu ai.

Dai sha n-ga KIA Masat (11) Dap Ba kawn mung Mali hka mayan Myen hpyen dap Sanghpaw lai lam hte gahtep ai shara hkan shanu nga ai Mung masha ni sadi maja nna nga na hte jau tau koi yen ai lam galaw na matu ndau laika shapraw da ai lam ni nga ai re hpe mung chye lu ai.

Myen hpyen dap Sanghpaw Lung wa ai lam dingyang hta PDF ni kawn mung gap gasat ai majaw Sanghpaw hten ai lup mat ai lam nga ai raitim naw ngam nga ai Sanghpaw ni matut manoi Jinghpaw Mung de man yawng lung wa ai re hpe mung chye lu ai. Ya lung wa ai Sanghpaw hpung ni gaw Manmaw ginra de man yawng nna lung wa ai re lam Hpyen masa maram nga ai ni kawn tsun da ai re.

Shiga – Hpring