Myen Hpyen Dap Shagyit Hkan Shawoi Na Hta Grau Jep Wa Ai Majaw Putao Myitkyina Hkrunlam Hkawm Masha Ni Hkawmsa Grau Yak Wa Ai Lam

Pajau Media

October 9, 2025

Gasat gala majan laja nga ai Jinghpaw Mung kata hkrun lam hkawm sa hkawm wa lam hta shagyit hkan grai jep shatsang ai majaw hkrun lam hkawm sa na matu grau yak wa ai hte du mayu ai shara de lawan ladan du hkawm na matu yak wa ai re nga nna Mung masha ni tsun ai.

Ya aten Myitkyina Sumpra Bum, Putao hkrun lam lapran laja lana jep wa ai majaw hkrun lam lapran aten grai na ai, Mung masha n kau ni gaw Mung Chying masat n lu ai majaw Nbung li hku n hkawm ai sha, Mawdaw hkrun lam hku hkawm sa ai raitim hkrun lam lapran kaw Mung Chying masat hpe madung jep wa ai majaw grau yak ai re lam chye lu ai.

Asak kaba sai ni gaw Mung Chying Masat n lawm tim atsawm tsun jahkrup nna mai lai ai re, Raitim asak ram ai ramma ni a matu grai yak hkak ai lam chye lu ai. Myitkyina kaw na n nan pru ai Tang Hpare shagyit sha n-ga Putao ginra Sum Pyi Yang mare, Lung Sha Yang, Mu Lar Shi Di shagyit hkan laja lana jep joi ai lam chye lu ai.

Mawdaw hte arai htaw ai hta arai ni hpe atsin ayang jep ai lam, kalang jep yang Min 30 hte hkying hkum mi daram na ai hte jep san shagyit law ai majaw lani mi hte n lu du mat sai lam hkrun lam hkawm masha ni tsun ai re.

 Myitkyina Putao hkrun lam lapran hta Myen hpyen dap hte KIA lahkawng maga shara la da ai re. 2024 May shata daram kaw nna Sumpra Bum hpe KIA zing madu ai hpang kaw nna Myen hpyen dap shagyit ni hkan jep joi ai lam grau laja lana galaw ai gaw ya aten du hkra re.

Myitkyina Putao lapran Nbungli hku, Mawdaw hku mai hkawm sa ai raitim Nbungli manu ni grai tsaw rawt wa ai majaw nlu jawn ai ni law ai lam, Myitkyina n yu n mai re ai Mung masha ni gaw kade yak hkak tim mawdaw hkrun lam hku hkawm sa ra taw ai hta shagyit hkan grai jep shatsang ai majaw yak hkak ai nga nna hkrun lam hkawm masha ni tsun ai kaw na chye lu ai.

Shiga- Pyilan U