Myen Hpyen Dap Uphkang Ai 4 Ning Jan Laman Mung Masha Dum Nta Sen Lam Wan Hkru Hten Za Mat

Pajau Media

November 26, 2025

Myen hpyen dap Mungdan daru magam zing madu ai 4 ning jan laman wan nat ai majaw mung masha dum nta (116,897) hten za mat ai lam Data For Myanmar kawn tang madun da ai.

Myen mungdan ting madang hku rai yang wan nat jahten hkrum ai mabyin kaw na Sagaing ginra hta gaw tsa lam shadang 65 % nga ai lam (76,990) du hkra nga ai rai nna Jinghpaw Mung kaw na dum nta (1,979) lawm ai re hpe mung chye lu ai.

Myen hpyen dap Mungdan daru magam zing madu ai 4 ning jan laman Myen hpyen dap hte rawt malan hpung ni lapran hpyen gasat gala grai laja lai wa sai rai nna wan nat jahten ai manghkang ni byin lai wa sai re. Myen hpyen dap pawng hpawm hpung ni gaw mung masha dum nta wan nat jahten ai lam galaw nna manu dan ai arung arai ni hpe la kau ya ai lam ni galaw ai re hpe mung chye lu ai.

dai wan nat jahten ai majaw 2021 shaning hta gaw dum nta 2,111 , 2022 shaning hta gaw (46,856), 2023 shaning hta gaw (31,728 ) , 2024 shaning hta gaw (31,916) hte 2025 May shata htum daram du hkra gaw dum nta (4,286) hten za sai re hpe mung chye lu ai.

shiga – Htu Seng