Myen Hpyen Dap Uphkang Ai (4) Ning Laman Mung Masha (6,813) Asak Si Sum Ai Lam AAPP N Dau Ai Lam

Pajau Media

June 24, 2025

Myen mungdan ting hta Myen hpyen dap uphkang ai (4) ning laman Myen hpyen dap a majaw mung masha marai (6,813) du hkra asak si sum lai wa sai hte naw shagrin la ra ai asak si sum masha marai (3,500) daram mung naw nga ai lam mung masa bawng masha ni hpe yu gawn nga ai AAPP hpung kawn ndau da ai re.

Rim hkrum ai kaw mung masha (29,316) nga ai lam dai kaw na marai (22,163) gaw ya aten du hkra naw sharen da hkrum ai lam, rim sharen da hkrum ai hta na marai (10,867) gaw htawng jahkrat hkrum ai re hpe mung chye lu ai. Raitim bai lawt pru wa ai gaw marai (7,153) re lam mung chye lu ai.

Myen hpyen dap a si ari jahkrat hkrum ai kaw mung masha marai (172) du hkra nga ai rai nna htawng kata kaw nan si ari jahkrat hkrum ai masha marai (128) hte sat kau hkrum ai masha marai (44) du hkra nga ai lam chye lu ai.

Dai sha n-ga ma kaji marai (620) daram mung ntara ai hku rim hkrum nga ai hte marai (834) asak si sum ai sha n-ga amyu shayi marai (6,109) mung rim sharen da hkrum ai re lam, rim sharen da hkrum ai kaw na amyu shayi marai (1,662) gaw asak si sum sai re hpe mung chye lu ai.

Shiga- Htu Seng