Myen Hpyen Dap Woi Awn Ai Ra Lata Poi lamang Hta Rawt Malan Hpung Ni Zing Madu Da Ai Shara Ni Mung Lawm Nga Ai Lam

Pajau Media

August 20, 2025

Myen Hpyen Dap woi awn galaw sa wa na Myen mungdan ting madang ra lata poi hpe du wa na December 28 ya shani kaw nna galaw na re hte ra lata poi galaw na hta Rawt Malan hpung ni zing madu da ai ginra (6) daram mung lawm nga ai lam chye lu ai.

Ra lata poi galaw na lamang hta Rawt Malan hpung ni zing madu da ai ginra ni mung lawm yang ginra (330) kaw galaw na rai nna lamang hpe FPTP( First- past- the Post , MMP (Mixed-Member Proportional representation system) PR( Proportional Representation System) ni hku nna galaw na matu hkyen da ai lam ra lata poi komiti kawn tsun da ai re hpe mung chye lu ai.

Jinghpaw Mung Chihpwi, Sawlaw, Sumpra Bum, Man Je, Nmawk hte Njang Yang ginra ni gaw KIA pawng hpawm hpung ni zing madu da ai ginra ni rai nna (PSLF/TNLA) zing madu da ai ginra ni, MNDAA zing madu da ai ginra ni hte UWSA Wa rawt malan hpung ni zing madu ai ginra ni mung ra lata poi galaw na ginra jahpan hta lawm nga ai re hpe mung chye lu ai.

Myen hpyen dap ra lata poi komiti kawn n dau da ai hta ra lata Sindan Pa law dik FPTP system hte galaw na Mung Hpawm rap daw shingjawng shara gaw (330) rai nna , FPTP, MMP hte PR system hte galaw na amyu sha rap daw ra lata poi shara ni gaw yawng rai yang (110) daram hta galaw sa wa na re lam n dau da ai re.

Ya aten Jinghpaw Mung Manmaw, Waimaw, Hpakant hte Mohnyin girna ni hta hpyen masa grai shaja hkat nga ai KIA pawng hpawm hpyen hpung ni mung Muklum zing majan matut manoi shang nga ai re hpe mung chye lu ai.

Shiga- Htu Seng