Myen Hpyen Dat Kawn Ra Lata Poi Shang Shingjawng Na Party Ni May 9 Ya Shani Hpang Jahtum Da Nna Ja Hpan Bang Na Matu Ndau

Pajau Media

May 7.2025

Myen hpyen dap gaw Nnang Nawn manghkang hpe shingdu tawn nna Mungdan kata htim gasat ai lam grau galaw wa ai sha n-ga Myen mungdan kata Ra Lata Poi hpe byin hkra galaw na matu grai hkyen lajang nga ai re hte Ra Lata Poi shang Shingjawng na party ni hku nna jahpan bang ai lam galaw na hpe May 9 ya shani hpang jahtum tawn nna galaw na matu n dau da ai re hpe chye lu ai.

Ya aten Myen mungdan gaw Nnang Nawn tsin yam a majaw sum machyi lam law nga ai aten ginra bai gaw gap masing ni galaw na matu Myen mungdan kata gap hkat gan jahkring ai lam hpe n htoi htawt sit nna bai n dau da ai raitim Jinghpaw mung shara sha n-ga Myen mungdan kata nbungli, drone, lak nak kaba ni hte gap gasat ai lam gaw shani shagu grai sawng nga ai re.

Nnang Nawn hpyen hte Mung dinghku majan a majaw grai yak hkak gin chyum chyat nga ai Myen mungdan kata Ra Lata Poi hpe 2025 December shata hte January laman Numdaw (4) garan nna galaw na lam April 8 ya shani Myen hpyen dap n dau wa sai hpe chye lu ai.

Myen hpyen dap gaw Ra Lata Poi galaw na matu masha jahpan hta kahkyin ai lam ni hpe Myen mungdan kata galaw nga ai hta Myen mungdan kata Myo 330 nga ai kaw nna 145 daram hkan sha jahpan lu hta nna ngam ai ginra hkan gaw majan hte Nnang Nawn hpyen hkrum sha ai a majaw jahpan tsep kawp n lu ai ginra ni law nga ai re hpe mung chye lu ai.

Ya byin nga ai masa hta galaw ai Ra Lata Poi gaw teng man ai mahtai lu na nre, Democracy Mungdan gaw gap lu na matu masha jahpan hta ai mung hpyen masa shamu shamawt lam she grau law ai lam, Myen hpyen dap masat shagrin ai asak 18 ning kaw nna 35 lapran hpyen magam n gun n mai ngu ai masing hpe grau hkrang shapraw galaw taw ai masa de du nga ai re. Myen hpyen dap galaw na Ra Lata Poi gaw teng man rap ra ai mahtai lu na n re nga nna shinggyim ahkaw ahkang yu reng hpung ni, Mung masa maram masam nga ai salang ni tsun dinglun nga ma ai hpe chye lu ai.

Myen hpyen dap woi awn galaw ai Ra Lata Poi hta shingjawng lawm na Party ni gaw May 9 ya shani hpang jahtum tawn nna jahpan galaw ra na hte May 5 ya shani du hkra rai yang jahpan bang ngut sai Mung masa party (54) nga sai lam Ra Lata Poi commission kawn n dau da ai hpe shiga ni hta mu lu ai re.

Shiga- Pyilan U