Myen Hpyen Kawn HIV, TB, Hkali Tsi Htuk Sha Ai Lam Hpe Tara Masat Kau Ai Majaw Muklum Kaba Hte Tsan Ai Mung Masha Ni Grai Yak Wa Mai Ai Lam

Pajau Media

August 13, 2025

Myen hpyen dap gaw HIV, TB, Hkali Tsi mawan hte seng nna shanhte uphkang ai ginra kata na tsi rung tsi gawk ni hkan sha htuk sha na matu matsat kau ai gaw Muklum kaba hte tsan ai shara hkan nga ai Mung masha ni a matu grai yak hkak wa mai ai lam ginra wuhpung wuhpawng ni tsun ding lun nga ma ai re.

 Jinghpaw Mung kata hta Myitkyina Muklum hta lai nna Kaga Muklum kaba hte tsan ai ginra hkan NGO, INGO wuhpung ni hku nna tsi mawan garum jaw ai re. Raitim Myen hpyen dap asuya gaw shanhte uphkang ai kata kaw nna tsi mawan htuk sha ai lam galaw na matu matsat kau ai majaw Hkali byin law ai Hka Hku Mung ginra, N jang Yang, Sumpra Bum ginra hkan na Mung masha ni grau yak hkak wa mai ai lam tsun da ai re.

Sumpra Bum, N jang Yang hkan na Mung masha ni law malawng gaw NGO wuphpung wuhpawng ni kaw sha law malawng tsi htuk sha ma ai re hte dai ginra hkan na Mung masha ni hpe gaw dingyang ngu na Kachin Backpack zawn re ai wuhpung wuhpawng ni tsi mawan garum jaw ai lam ni nga ai re. Myen hpyen dap gaw ya na zawn galaw ai gaw masing nga nga hte galaw ai lam re.

Mung masa yak hkak nga ai aten re hte lam shagu grai yak hkak nga ai aten hta ya na zawn galaw ai gaw shinggyim ahkaw ahkang tawt lai ai re ngu sha mu mada ai lam, grau nna rawt malan hpung ni uphkang ai ginra de Tsi mawan nlu hkra masing nga nga hkum pat ai re ngu sha mu mada ai lam shinggyim wuhpung wuhpawng ni tsun dinglun nga ma ai re.

Myen hpyen dap gaw August 7 ya kaw nna HIV, TB tsi hte Hka li tsi zawn re ai ni hpe Myen hpyen dap uphkang ai npu kaw na sha nrai yang kaga INGO, NGO wuhpung wuhpawng ni hku nna htuk jaw ai lam, shinggan wuhpung wuhpawng hte gindun ai tsi gawk hkan na htuk sha ahkang pat kau sai re.

N dai masa hku rai yang dingyang tsi htuk sha ra ai Mung masha ni grai yak hkak na masa re hpe chye lu ai. Jinghpaw Mung kata ya aten Rawt Malan hpung ni zing madu da ai ginra ni hkan gaw shinggan wuhpung wuhpawng sa du gawan nna tsi mawan garum jaw ai lam ni galaw nga ai re hte ya matsat dat ai tara a majaw Putao ginra Sumpra Bum, N jang Yang zawn re ai ginra hkan na Mung masha grau yak hkak wa mai ai re hpe mung chye lu ai.

Shiga – Pyilan U