Myen Mungdan Kata Masha Marai (5) Lahta Sat Hkrum Ai Mabyin Grau Law Wa Ai Lam

Pajau Media

October 10, 2025

Myen mungdan ting madang hta Mung masha marai (5) lahta wuhpung hku sat hkrum ai mabyin gaw lani hte lani law wa ai hta May shata kaw na August shata du hkra rai yang shata (4) laman wuhpung hku sat hkrum ai masha marai (637) nga ai lam October 8 ya shani Nyan Lynn Thit sawk sagawn hpung kawn n dau da ai re.

Myen mungdan kata nga ai ginra (38) hta Myen hpyen dap sha n-ga Laknak lang rawt malan hpung ni, Mying n chye lu ai Laknak lang hpung ni a majaw Mung masha wuhpung hku asak si sum mat ai mabyin (68) lang byin ai hpe chye lu ai. Dai kaw (66) lang gaw Myen hpyen dap tawt lai ai re lam hte rawt malan hpung ni gap ai majaw Myen hpyen dap nta masha ni asak si sum ai lam lawm ai zawn kadai re n chye ai Laknak lang hpung ni a majaw mung lawm ai lam tang madun da ai re.

 Grau nna gaw Nbungli hku htim gasat ai majaw asak si sum ai (39) lang hte law dik rai nna numbat (2) law dik gaw Hpyen shamu htu shadut ai aten sat hkrum ai mabyin (13) lang re ai lam tsun da ai re. Gasat gala majan lapran sat hkrum ai mabyin gaw (5) lang re hte numbat (3) law dik re lam tang madun da ai. Gasat gala majan lapran sat hkrum ai mabyin law ai gaw Sam Mung dingdung daw, Magwi, Bago ginra, Thanintharyi ginra ni hta byin law ai lam tsun da ai re.

Mung masha ni wuhpung hku sat hkrum ai mabyin ni gaw Myen hpyen dap, Pyuzawhti hpung ni hte Rawt Malan hpung ni gasat gala byin ai ginra hkan sha n-ga Rawt Malan hpung ni n-gun kaba ai ngu maram lu ai ginra hkan Hpyen n-gun htu shadut ai hta atik anang rim woi ai lam, Amyu shayi ni hpe mazut roi rip, Mare Wan nat jahten ai sha n-ga Mung masha hpe hpyen ninggang shatai nna rim woi mat ai mabyin ni mung lawm nga ai re hpe chye lu ai.

Ndai sawk sagawn n dau laika gaw Rawt Malan hpung ni a ndau laika ni hte wang lu wang lang re ai Myen mungdan shiga dap (40) daram hpe n pawt tawn sawk sagawn tang madun da ai re lam chye lu ai.

Mung masha whpung hku sat hkrum ai lam gaw 2021 shaning hta marai 570, 2022 ning hta marai (612), 2023 ning hta (939), 2024 ning hta (1,484) hte 2025 ning January kaw na August du hkra rai yang 1,122 nga ai lam tsun da ai re.

Myen mungdan kata gasat gala majan gaw grau grau laja nga ai hta Myen hpyen dap kawn Nbungli hpe madung tawn jai lang ai majaw mara kata Mung masha wuhpung hku asak si sum ai lam grau grau law wa ai re. Jinghpaw Mung kata hta mung Myen hpyen dap Nbungli bawm, Laknak kaba, Drone bawm a majaw September shata laman hta sha yawm htum Mung masha marai (19) asak si sum lai wa sai KHRW kawn tang madun da ai re.

Shiga- Pyilan U