Myen Mungdan Kata Myen Hpyen Dap Uphkang Ai Hpang Gumhpraw Dum Hte Ja Seng Damya Mya Hkrum Ai Lang (82) Lang Byin Ai Lam

Pajau Media Channel

5 Mach 2024

Myen hpyen dap mungdan ahkaw ahkang zing madu ai masum ning laman Mungdan kata gumhpraw dum ni hte ja seng ni hkan damya mya ai manghkang (82) lang byin ai lam Myen mungdan hte seng nna sawk sagawn hpung Data for Myanmar kawn Feb (20) ya shani sawk sagawn tang madun da ai kaw na mu chye lu ai.

Gumhpraw dum ni hkan damya sa mya ai mabyin gaw (25) lang byin nna ja seng hkan mya ai mabyin gaw (57) lang byin ai re lam Data for Myanmar tang madun da ai. Ja seng ni hta damya mya ai manghkang hpe yu yang Mandalay ginra nga ja seng ni hta (12) lang, Yangon ginra kaw (6) lang, Jinghpaw mung Hpakant ginra kaw (3) lang re lam hte damya manghkang law dik gaw Mandalay ginra hta byin law dik re lam chye lu ai. Jinghpaw mung, Sagaing ginra, Sam mung dingda daw ginra ni hta mung byin ai lam mung chye lu ai.

Gumhpraw dum hkan damya mya ai manghkang byin law dik gaw 2021 shaning hte 2022 shaning ni hta law dik re ai rai nna ja seng hkan gaw 2022 kaw nna 2024 shaning n nan du hkra shata shagu kalang ram gaw byin nga ai masa re lam mung tang madun da ai. Ya na zawn damya mya ai manghkang hte seng nna lu rim ai gaw tsa lam shadang (20) daram sha nga ai re hte ja seng damya mya hkrum ai hta ja seng madu hte seng kaw bungli galaw masha marai (2) asak si sum ai hte marai (7) du hkra hkala hkrum ai lam ni nga lai wa sai lam Data for Myanmar kawn sawk sagawn tang madun da ai kaw na chye lu ai.

Photo credit