Myen Mungdan Kata N Nang Nawn Tsin Yam Hkrum Ai Shata Mi Hpring Sai lam

Pajau Media

April 29.2025

Myen mungdan kata N nang Nawn tsin yam hkrum ai April 28 ya shani hta shata mi hpring sai raitim ya aten du hkra N nang nawn a majaw asak si sum ai moi mang ni hpe hkye shaw ai lam ni naw galaw nga ai lam chye lu ai.

Myen mungdan hpe mungkan mungdan (26) kaw nna mung garum ningtum jaw da ai hpe Myen hpyen dap gaw hkye mawoi bungli shang ai lam, tsin yam hkrum masha ni hpe tang du hkra garum ai lam n nga ai nga nna tsin yam hkrum masha ni shiga dap ni de tsun da ai re.

Myen hpyen dap gaw gap hkat gan jahkring ai lam n dau ai laman rawt malan hpung ni nga ai ginra de nbungli bawm, lak nak kaba hkrup mara gap bang ai lam, hpyen n-gun hkying kaba htu shadut lung wa ai majaw ya aten Jinghpaw mung kata hta mung Myitkyina Hpakant lam mayan na mare kahtawng ni, Danai Lido lam mayan na mare kahtawng hkan na Mung masha ni yawng hpyen koi yen ra mat ai re hpe chye lu ai.

N-gun 7.7 Maganitude nga ai N nang Nawn gaw Myen mungdan kata March 28 ya shani hta byin wa ai re hte April 28 ya shani gaw shata mi hpring sai re. N nang Nawn a majaw Myen mungdan ting hta dum nta Mun (63,854) hkawt hten za hkrum nna Mung masha Sen (629,206) hkawt N nang Nawn hpyen hkrum sha ai hte asak si sum ai masha (3,769), hkala ai masha (5,106), naw mat nga ai masha (107) naw nga ai lam Myen hpyen dap n dau da ai kaw na chye lu ai.

Shiga – Pyilan U