Myen Mungdan Kata N Sam Galai Ai Covid Ana Kap Bra Hpang Nga Sai Lam

Pajau Media

May 28.2025

Myen mungdan kata Covid -19 ana zinli tsin yam laja lana hkrum sha ai (5) ning jan ai hpang Omicron ana kumla hte bung nna N sam Mying n bung ai JN1,XEC ana zinli hpan kap bra wa sai majaw grai sadi maja ra ai lam Myen mung hkamja Lam hkring mang rung kawn n dau da ai re.

Ya aten Omicron ana kumla hte bung ai JN1,XEC ana gaw Myen mungdan a Htingbu mungdan rai nga ai Thai Mung dan kata Masha Sen Mi jan kaw kap bra nna Masha marai (27) asak si sum ai lam nga sai re. May shata Laman hta Myen mungdan kata mung JN1,XEC kap bra ai masha (1) hpe mu jep ai hte Grai sadi maja na matu Hkamja lam hkringmang rung tsun ndau da ai re.

Kalang bai N sam Mying galai nna byin hpang wa ai JN1.XEC ana hpan gaw Covid -19 ana ram n-gun n ja ai raitim Makawp maga tsi n htu ga shi ai asak kaji ai Ma, Masha kaba yawng Hte Sin wawp ana lu ai ni, Sade n-gun n rawng ai ni, aten galu machyi makaw hkrum ai masha ni, asak 65 lahta hkam ja lam n nga ai gumgai dingla ni hta kap yang asak si sum ai madang byin chye ai majaw grai sadi maja ra ai lam tsun da ai re.

Ana byin wa ai Kumla gaw langai hte langai n bung ai, Law malawng hta byin law ai gaw Baw Kawa Machyi ai, Nep Sang Kabya ai, Jahkru ai ni law malawng byin ai re hte n kau hta gaw Madawn ,Kan Mase, Hkum ali ahti nga n pyaw ai, Sama n na mat ai zawn re ai ni mung byin ai re lam Hkam Ja lam hpaji ninghkring tsun da ai re.

Ya aten JN1,XEC ana gaw Myen mung , Thai, American , Miwa, Uk, Vietnam. Singapore, Denmark Mungdan ni hta chyam bra nga sai re. Myen mungdan kata Lanam ladaw du shang wa sai re majaw Hkali, Waw Waw machyi law ai ladaw re majaw grau sadi maja ra ai lam tsun da ai.

Mungkan mungdan ting kap bra mat ai covid -19 ana zinli a majaw asak si sum ai masha Wan (7) nga lai wa sai hta myen mungdan hta mung Covid N nan byin hpang ai 2020 kaw nna 2025 May shata du hkra rai Yang asak si sum ai masha (19,494) nga ai lam Myen mung hkam ja lam hkringmang rung kawn tang madun da ai.

 Shiga- Pyilan U