Myen Mungdan Kata Shingra Makau Grup Yin Hten Za Lam Laning Hte Laning Grau Law Wa Ai Lam

Pajau Media

June 20.2025

Myen hpyen dap mungdan ahkaw ahkang zing madu ai hpang kaw nna Jinghpaw mung sha n-ga Myen mungdan kata shingra makau grup yin hten za lam laning hte laning law wa ai hte n dai lam hte seng nna wang lu wang lang tsun shaga ahkang ni mung grai hkrat sum ai lam shingra makau grup yin yu maram nga ai hpaji ninghkring ni tsun ai.

2021 hpang daw kaw nna Myen mungdan kata shinggyim ahkaw ahkang tawt lai ai lam sha n-ga Nam Maling Hpun Kawa ni hten za ai, Hka shi , Hkanu ni hten za ai lam ni a majaw shingra hpyen hkrum sha ai lam laning hte laning sawng nga ai re. Grau nna gaw Ngang kang ai Uphkang masa hten za mat ai hpang ahkaw ahkang lu ai ni mung lu ai hku hpun shaw ai lam, Ja htu ai lam, N hprang htu shaw ai lam ni kam ai hku galaw ai majaw re lam chye lu ai.

Hpun kawa ni hpe kam ai hku shaw dut sha, Ja ladu lai htu sha ai lam ni a majaw Hka lam ni hten za nna Lamu ga ni n ngang wa ai majaw hka kaba ai lam, Lamu ga gyi ai shingra hpyen tsin yam hkrum sha lam law wa ai re.

Jinghpaw mung ginra kata hta mung 2025 May shata htum wa maga kaw nna June praw laman marang ladu lai htu sawng ai majaw Putao, Hkawng lang Hpu, Nawng Mung, Lang Se, Sadung, Chyihpwi, Kanpaiti, Waimaw, Myitkyina ginra ni hta Hka kaba ai majaw dum nta yawng lawm mat ai lam, Hkrun lam mahkrai ni hten za ai sha n-ga Mung masha marai (6) daram asak si sum nna Mung masha hkying lam hka hpyen hkrum sha mat ai re hpe mung chye lu ai.

Myen mungdan kata ya na zawn shingra makau grup yin hten za ai majaw sum machyi ai lam law law byin nga ai raitim n dai lam hte seng nna tsun shaga ahkaw ahkang mung hkrat sum nga ai re.

Grau nna Myen mungdan kata Ja htu sha ai lam, N hprang htu shaw ai lam ni hpe ahkaw ahkang lu ai Asuya hte gindun nna galaw sha ai Luban Lau na ni law ai re majaw lit nga ai asuya kawn mung ahkyak la ai lam n nga ai majaw Myen mungdan shingra makau grup yin hten za lam gaw laning hte laning sawng wa ai re.

Myen mungdan shingra masa hte seng nna Global Forest Watch kawn tsun ai hta 2024 ning laman hta sha myen mungdan kata Nam Hpun kawa hten za lam gaw Eka 710,000 jan nga ai lam tsun da ai. Myen mungdan kata du hkra ladaw maram masam nga ai Hpaji ninghkring ni tsun ai hta dai ning gaw shawoi shaning na hta grau marang kaba wa mai ai majaw Hka hpyen sadi maja ra ai lam tsun sadi jaw da ai re.

Shiga- Pyilan U