Myen Mungdan Kata Tinang Hkum Tinang Sat Si Ai Masha Asak 19 Ning Kaw Na 25 Ning Ni Law Malawng Re Lam

Pajau Media

October 24.2025

Myen Mungdan kata 2025 ning laman hta tinang hkum tinang je yang sat si ai masha marai 86 du hkra nga wa ai hte dai sat si ai hta law malawng gaw Asak 19 ning kaw na 25 ning lapran na ni law ai lam DVB shiga dap kawn sawk sagawn tang madun da ai kaw na chye lu ai.

Myen mungdan kata shani shagu gasat gala majan, Nbungli bawm dingsa gasat hkrum ai lam, Majan a majaw Dum n ta masa ni, Hkum hkrang lagaw lata sum mat ai zawn re ai mayak manghkang ni hkrum katut nga ai hpang manghkang kaba langai gaw tinang hkum tinang je yang sat si ai lam law wa ai re hpe chye lu ai.

Tinang hkum tinang sat si ai hta law malawng gaw asak ram ai Ramma ni law ai re hte dai hta Myen hpyen dap a hpyen magam n gun n mai ngu ai Tara hta shang taw ai Ramma ni mung lawm ai re hpe chye lu ai.

Tinang hkum tinang sat si ai manghkang n pawt gaw myit daw ai lam sawng dik madang de du mat ai majaw re lam sawk sagawn hpung ni tang madun da ai.

Myit daw myit hten ai zawn hkrum sha wa ai hte Dum n ta masha ni, tinang kam ging ai ni hte matut mahkai n di hkra nga ra na lam, hkum hkrang shamu shamawt ginsup ai lam, hkam ja lam hte bung pre ai lu sha ni hpe sha ra na hte hkru hkru yup, Lu sha man man sha ra na lam, hpaji jaw ai ladat ni hte mai galaw ai lam tsun hpaji jaw da ai re.

Myen mungdan kata tinang hkum tinang sat si ai hta Tsa lam shadang 80% gaw amyu shadang la ni rai nna Tsa lam shadang 20% gaw amyu shayi ni re lam chye lu ai.

Mungkan Hkam Ja hpung kawn tang madun da ai hta Mungkan hta shaning shagu masha sen 8 daram tinang hkum tinang je yang sat si hkrum nga ai rai nna gasat gala majan byin ai ginra na masha marai 5 kaw na marai 1 gaw myit ana lu ai lam tang madun da ai re.

Shiga - Pyilan U

Photo credit to DVB