Myen Mungdan Mung Dinghku Majan Aten Grau Galu Wa Mai Ai Lam KIO Ningbaw Tsun Ai Lam

Pajau Media

October 25, 2025

Myen Hpyen Dap gaw ya aten Mungdan ting madang galaw na Ra lata poi a matu hkyen shajin nga ai re hte n dai Ra lata poi a majaw Myen Mungdan Mung Dinghku majan gaw grau galu wa mai ai lam KIO Ningbaw Kaba kawn KIO Masat N Htoi Mungga hta tsun ai re.

Myen Hpyen Dap kawn woi awn galaw na Ra lata poi hpe madi shadaw ai hpung hte ninghkap ai hpung kaba lahkawng gaw pru wa na re lam, dai hpung lahkawng jahkrup la matu yak mat wa na re majaw Myen Mungdan Mung Dinghku majan mung aten grau galu wa na re hte bawng ban jahkrup ai lam n mai galaw na hpe grai myit tsang ai lam tsun da ai re.

Masat n htoi mungga hta majan rau chyawm gasat nga ai kaga amyu sha ni, kaga Rawt malan hpung ni hpe mung tsawra myit hte lata gindun nga na lam, Myu hte Mungdan a matu asak ap nawng, hkum hkrang daw chyen ap nawng sai ni kaman n di kau na re lam, KIO ginjaw komiti gaw Hpyen masa, Mung masa hpe Pai Hkra sharap shara let ngang grin ai simsa lam gaw gap nga ai aten re hte awng dang hkra galaw shakut sa wa na lam KIO Ningbaw tsun ai re hpe chye lu ai.

KIO hpe lai wa sai 1960 ning October 25 ya shani hta hpaw hpang dat sai re hte dai ning gaw 65 ning hpring sai re hpe chye lu ai. N dai masat n htoi hpe Shanglawt Uphkang ginra kata shara shagu hta masat n htoi mungga chyawm madat hkam la ai hpawng lamang ni galaw ai re hpe mung chye lu ai.

Shiga - Pyilan u