Myen Shaning N Nan Htawng Masha Hkying Masum Jan Shalawt Ai Kaw KBC Ningbaw Usa Sara Kaba Rev.Dr Hkalam Sam Sun Mung Lawm Ai Lam

Pajau Media Channel

17th April 2024

Myen hka jaw poi ngut ai hpang myen shaning n nan praw (1) ya shani hta shaning shagu htawng masha shalawt ai lam ni galaw ai hta 2024 ning April 17 ya hta mung myen mungdan ting hta htawng masha hkying masun jan shalawt ai kaw KBC Ningbaw Usa sara Kaba Rev.Dr Hkalam Sam Sun mung lawt pru wa sai re.

Sara kaba gaw April 17 ya shana daw hkying langai daram hta Myitkyina htawng kaw nna lawt wa ai re hte simsa lam bawngban hpung PCG hpung ni, nawku makam masham hpung woi sara ni, dum nta masha ni sa tau la ai re. Rev Dr Hkalam Sam Sun hpe myen hpyen dap kawn lai wa sai 2022 ning Dec praw 5 ya shani Thai mungdan de tsi tsi hkawm la na matu Mandalay nbungli daru kaw n bungli jawn na aten hpe la nga yang rim hkrum ai re.

Dai hpang sara kaba hpe myen hpyen dap kawn tara upadi daw 17/1, daw 505 (က), daw 52 (က) ‌amu ni hte tara jewat hkrum nna htawng dam 6 ning jahkrat hkrum ai hte dai ni laning mi shata mali na ai hpang lawt pru wa ai re hpe mung chye lu ai. Myen hpyen dap gaw shaning shagu myen shaning n nan shani hta htawng masha shalawt ai lam ni hpe galaw ai raitim mung masa galaw nna htawng hkrat hkrum ai ni hpe shalawt ya ai lam gaw n law ai re. Dai ning na htawng masha shalawt ai hta mung masa bawng masha kade lawm ai ngu hpe gaw tup hkrak n lu tsun ai re hpe mung chye lu ai.

Sumla - KBC