Myitkyina De Htaw Shalai Na Tsi Mawan Ni Hpe Myen Hpyen Dap Zing Kau Ai Lam

Pajau Media

2 January 2026

Myitkyina de htaw shalai na hkyen nga ai tsi mawan ni hpe Myen Hpyen Dap lam lapran kaw zing kau ai lam tsi dut mari masha ni kaw na chye lu ai.

"Shaning Nnan shani rai nga Myitkyina kaw na tsi mawan dut shabra seng kaba hpaw ai ni a tsi gunrai htaw wa ai kaw Monywa lam n tsa kaw Myen Hpyen Dap hkap zing la kau ai , na wa yang tsi ni gaw hten sana " nga nna tsi dut hpaga galaw masha tsun ai re.

Myitkyina de htaw shalai na tsi mawan ni hpe Myen Hpyen Dap zing madu kau ai re hte Myitkyina kaw na tsi seng kaba ni rai nga ai မြတ်မွန်‌ဒိုင်ကြီးတွေ၊ စိန်အုံးသီး၊ ခင်မာသီရိ tsi seng kaba hte kaga tsi seng ni hkan dut shabra na tsi mawan ni re lam chye lu ai.

"Tsi ni hpe law malawng mawdaw lam hku sha htaw shalai la ai re, jahpan n jaw da ai tsi ni hpe rim zing mayu yang mai ai, ya gaw jahpan jaw da ai tsi ni yawng hpe zing kau sai" nga nna tsun ai re.

Myen Hpyen Dap kawn tsi mawan htaw shalai ai lam hte seng nna tara masat ai lam galaw ai hpang htaw shalai la na matu grai yak hkak mat ai re.

Myitkyina kaw tsi mawan n kau taw sai lam, Gunrai manu ni mung grai tsaw rawt mat ai lam chye lu ai.

Shiga-Zaw