Myitkyina Du Kahtawng Lawk Kaw Ramma Langai Hpe Damya Hpung Adup Gayet Ai Majaw Garep N Ra Daw Mat Ai Lam

Pajau Media

July 28, 2025

Lai wa sai July 27 ya shana hkying 8:00 PM aten daram hta ramma langai gaw dum nta wa lam Myitkyina Du Kahtawng lawk kaw mying nchye lu ai masha marai (4) kawn hkap gayet ai majaw lahkra maga garep n ra daw mat ai lam ni nawn ai masha ni kaw nna chye lu ai.

“Shi cycle mung grai hten mat ai, damya hpung ni ni gaw cycle gaw bai n la mat, chyawm adup nna bai hprawng mat ai, ningma gaw tsawm mara law ai, la hkra maga garep daw mat ai, cycle zaw gaw mat mat ai tim jak bai nsi na tsamai ai, baw hte lagaw hkan sai hkrai , palawng mung je mat ai, cycle gaw bai lu gawt wa na tsamai ” nga nna tsun ai.

Mabyin gaw Du Kahtawng Kaung Myat Kyaw lu sha seng kaw nna cycle gau wa ai aten lam kaw la nga ai masha marai (4) gaw kalang ta shingna galu hte shawng gayet dat ai majaw cycle galau mat ai re lam, cycle galau nga ai kaw chyawm adup ai re hte dai shaloi seng kaw nna masha ni pru wa ai majaw damya hpung ni hprawng mat ai re lam chye lu ai.

Damya mya hkrum ai la gaw asak (24) ning daram re ai ramma rai nna ya aten garep nra daw mat ai majaw tsi tsi hkam la nga ai re. Shi hpe chyawm adup ai damya hpung ni gaw asak 10 jan ning re ai ramma pang ni re lam mung chye lu ai.

Myitkyina Muklum hta uphkang masa hten za mat ai hpang kaw nna lagut damya manghkang ni grau law wa ai rai nna ya na zawn adup gayet manghkang ni jahkring hkring byin nga ai raitim lit la hparan ya ai lam n nga ai majaw lani hte lani grau grau sawng wa ai re hpe mung chye lu ai.

Shiga- Htu Seng