Myitkyina ginra hta Jak sau mari lang na matu grai yak wa ai shiga

Pajau Media Channel

Mungdan masa lam a majaw ya aten gunrai manu ni lani hte lani tsaw wa re hte Myitkyina, Waimaw ginra ni hkan jak sau mari la na matu grai yak ai madang byin nga ai re lam ginra masha ni tsun ai.

Jak sau manu ni One Liter hta Hkying Masum du mat ai sha n-ga ya aten Sau Seng ni law malawng pat da ai re, Myitkyina muklum hta Zey Yar Min Sau seng langai sha hpaw ai re hte One liter sha dut ya ai re “ ya gaw sau bang na shara n nga ai, Nawng nang de gaw sa ra Sau gaw n law, Sau Seng shagu mung n hpaw ai re majaw Sau hkan tam ai gaw bungli langai zawn byin wa ai, Hpaw ai sau seng sha mung marai langai hkying masum na sha ai bang ai, hkawm sa gaw ra re di, N dai kaw kalang bang kaga shara mi de bai htawt nna bai gayin bang la ra re di grai yak ai” nga nna Myitkyina ginra masha tsun ai.

Waimaw muklum hta mung Sau seng law law n hpaw mat sai re hte Sau Seng kaba ni rai nga ai Top, Zay Yar Min, King sau seng masum sha hpaw ai, shani Ka-ang daram du hkra sha hpaw ai re hte grai sharam nna she dut ya nga ai nga nna mung masha langai tsun ai. “Waimaw kaw mung sau grai taw mat sai, Sau seng mung Muklum ting ngu na daram hta pat da ai re, dut gaw dut ya tim grai sharam na dut ya nga ai, marai langai kaw one liter sha dut ya ai ” lam Waimaw ginra masha tsun da ai re.

Myitkyina muklum ting ngu na daram sau seng pat mat ai gaw November 21 ya kaw nna re hte Wai Maw ginra hta gaw lai wa sai masum ya hkan na re sai hpe mung chye lu ai. Jak sau sha n-ga Gunrai manu ni mung grai tsaw wa ai re, Majan a majaw hkawm sa hkrun lam pat tawn da lam ni a majaw ya na zawn gunrai manu ni tsaw wa ai masa re lam ginra masha ni tsun garu nga ma ai re, grau nna gaw Jinghpaw mung hte Sagaing jarit mayan Nam Si Awng shagyit kaba pat pat tawn da ai November (16) daram kaw na rai sai hte ya aten du hkra naw pat nga ai re hpe mung chye lu ai.