Myitkyina Ginra Kata Mawdaw Gashin, Byeng Ai Seng Hpaw Ai Hta Shawoi Na Zawn Bungli Kri Na Matu Yak Wa Ai Lam

Pajau Media

July 2.2025

Without mawdaw cycle ni rim hpang wa ai hpang kaw nna ginra kata Jawng ma jawng sa kaw na hkawt Mung masha ni lam magup yak hkak mat ai re hta mawdaw hpe madung tawn nna galaw lu galaw sha ai Mawdaw gashin hte byeng seng hpaw ai ni bungli matut kri na matu pyi yak hkak wa ai lam seng hpaw sha ai masha ni tsun ai re.

Mayak hte seng na Mawdaw cycle gashin, Mawdaw byeng nna Kanbau nga ai Seng madu langai tsun ai hta “ Mawdaw cycle gashin, body ni loi byeng ai seng hpaw da ai rai nga, anhte gaw dai sha galaw ai re, shanhte Mawdaw cycle rim ai majaw Mawdaw Pru Shang lam ni grai yawm mat sai, lani mi tup rai yang pyi Mawdaw langai lahkawng daram hte sha jan du mat ai, seng kaw gaw bungli galaw na Ma ni mung shaga da re, shat sha na nga ra ai madang she rai mat sai ” nga nna Myitkyina Dap Kawng Lam maw kaw Mawdaw gashin Seng hpaw da ai seng madu langai tsun ai re.

Mawdaw cycle n rim shi ai hkan gaw lani mi Mawdaw 10 jan gaw dingyang sa ai re, raitim Mawdaw cycle rim ai hpang lani mi tup tim Mawdaw langai hta lai na n sa ai madang re sai lam chye lu ai. Ap da ai mawdaw ni hpe sha byeng na shalai taw ai masa re hte mawdaw n nan gaw n shang ai daram re mat majaw n dai bungli matut galaw na matu pyi yak wa ai madang byin nga ai lam chye lu ai.

Dai sha n-ga Mawdaw dut hpaga galaw nna kanbau nga ai Mung masha ni mung Without mawdaw rim ai hpang kaw nna Mawdaw ni kadai n mari mat ai, manu shayawm nna dut tim pyi mari ai masha n nga ai madang byin nga ai majaw bungli hkring ra mat ai madang byin nga sai re hpe chye lu ai.

Jinghpaw Mung Myitkyina ginra kaw May shata htum maga kaw nna Mawdaw cycle ni hpe shana hkying 9,10 hpang daw de hkawm sa ai ni hpe madung rim nna rim hkrum ai ni gaw masha lawt na matu Gumhpraw sen 30 kaw nna 50 lapran dam gayet ai lam, n kau hpe gaw tara rung kaw amu hparan nna she dat ya ai madang byin nga ai re lam ginra masha ni tsun ai kaw na chye lu ai.

Ya aten Myitkyina Muklum kata Jawng ma ni jawng sa jawng wa aten hta lai nna ngam ai aten Mawdaw cycle rim nga dingyang re. Ya na zawn Myen hpyen dap asuya galaw nga ai masa gaw Mung masha a gumhpraw sumbu kaw na gumhpraw shaw la ai ladat she re nga nna mung masha ni tsun dinlun nga ma ai re.

Shiga- Pyilan U