Myitkyina Ginra Kata Shana Aten Seng Dung Ai Masha Yawm Wa Ai Majaw Shana Aten Seng Hpaw Sha Ai Ni Dut Lu Dut Sha Lam Mayak Hkrum Katut Nga Ai Lam

Pajau Media Channel

26th February, 2024

Myen hpyen dap kawn mungdan masha shagu hpyen magam n-gun n mai Upadi masat shagrin dat ai hpang kaw nna aten n tam masha lahkawn rim ai lam ni galaw wa ai majaw Myitkyina girna kata shana aten hpaw ai seng ni hta mari sha masha ram ram yawm wa ai majaw seng hpe dingyang lu hpaw hkra galaw la na matu grai yak wa ai re nga nna shana seng hpaw sha masha ni tsun ai.

Shana hpaw ai lu sha seng kasha n kau gaw tinang dang di dang dep ai masa hte loi li mahkawng la nna hpaw hpang wa ai re, shawoi gaw Myitkyina ginra na lu sha seng shagu ngu na daram hta masha grai chyat ai re, raitim myen hpyen dap a shagrin dat ai Upadi a majaw lam shagu grai hkrit tsang ra ai masa re majaw shana aten seng kadai n gwi dung mat ai, shana gat ni hkan mung sa du mari sha ai mung masha grai hpa mat ai masa re lam shana seng hpaw sha nga ai mung masha langai mayak hpe tsun dan ai.

“Anhte na seng gaw shana de mari sha ai masha ni hpe sha kam hpa nna hpaw sha nga ai re, Hpyen magam n-gun n mai Upadi a majaw shana daw hta seng de mari sha masha ni nau n du wa ai, shana pru hkawm yang rim hkrum na tsang ai majaw kadai mung n gwi pru ai masa re, masha n sa yang anhte lu ai daram hte sha arang bang nna hpaw da ai seng ni gaw sum machyi ai lam law law byin ai” nga nna tsun dan ai re.

N kau lu sha seng kaba ni hkan gaw lak nak lang hpung lahkawng maga hte matut mahkai nga ai re majaw shanhte a matu gaw grai sum machyi ai lam n nga ai, Seng dung ai masha ni a shimlam du hkra makawp maga lu ai madang re, tinang lu ai daram hpe arang bang nna hpaw sha ai ni a matu gaw lam shagu grai myit tsang hpa re nga nna mung matut tsun dan ai.

“Anhte gaw ahkaw ahkang lu tim matut mahkai lam n nga ai, Mung masa a majaw masha n sa yang gat n lu dut ai, shang gumhpraw n nga ai lapran seng hpe dingyang lu hpaw hkra mai byin ai masa hte shakut nga ai re”.

Ya aten mungdan kata nnan bai masat shagrin dat ai tara upadi a majaw lam shagu grai hkrit tsang ginchyum chyat mat ai re, ya aten na masa gaw lak nak lang uhpung uhpawng ni kawn mung masha rim lahkawn ai lam galaw nga ai re majaw Myitkyina ginra kata hkawm sa hkawm wa lam lapran kaw nna dum nta de n du wa, matut mahkai n lu mat ai mabyin ni mung law law nga wa ai re lam mung chye lu ai.