Myitkyina-Hpakant Lam N Htoi N Masat Bai Pat Da

Pajau Media

April 24,2025

Myitkyina-Hpakant ginra hkawm sa lam hpe hpyen dap lahkawng maga kawn aten n masat pat kau sai hte Ka Mai ginra mayan de Myen hpyen dap kawn hpyen n-gun jat shamu shamawt nga ai lam hkrun lam hkawm masha ni tsun ai kaw na chye lu ai.

“Lam hpe Myen hpyen dap maga kaw na shawng pat ai, shanhte pat ai masum ya daram na ai hpang KIA maga kawn bai pat da ai re. Dingyang hkawm sa nga ai hkrun lam hkawm masha ni grai yak nga sai. Myen hpyen dap gaw Ka Mai ginra de hpyen n gun htu shadut shamu shamawt nga ai majaw grau sadi maja nna nga nga ra ai,” nga nna Ka Mai ginra masha tsun ai.

Myen hpyen dap kawn April 21 ya kaw nna Myitkyina-Hpakant hkawm sa hkrun lam hpe pat kau ai hpang KIA maga mung April 24 ya kaw nna aten n masat pat kau ai majaw hkawm sa hkawm wa galaw nga ai mung masha ni yak hkak nga ai lam mung chye lu ai.

Ya na zawn KIA lam pat kau ai masa gaw Myen hpyen dap kawn gap hkat jahkring ai n htoi jat masat ai lam ndau ai raitim Ka Mai myo kata de hpyen n-gun jat hpyen shamu shamawt wa ai majaw ya na zawn pat kau ai re lam shawng lam shi sawk ni tsun ai.

“Myen hpyen dap gaw gap hkat jahkring ai nga tim Ka Mai de hpyen n-gun jat shamu shamawt wa ai, dai majaw anhte maga kaw na mung bai pat kau ai re.”

Myen hpyen dap gaw maga mi de gap hkat jahkring ai lam ndau tim Jinghpaw mung shara shagu de nbungli, laknak kaba, Drone ni the matut manoi gap bun nga dingyang re. Ya aten Mohnyin ginra Indaw gyi ginra mayan de mung gasat gala majan byin nga ai re hte Myen hpyen dap kawn nbungli bawm ni matut manoi gap bun nga ai re hpe chye lu ai.

Shiga: Hpring