Myitkyina Htawng Kaw N-Gun Madun Kasu Kabrawng Manghkang Byin Ai Hta Htawng Masha Asak Si Sum Ai Lam Nga

Pajau Media Channel

19th April, 2024

Jinghpaw Mung Myitkyina Htawng kaw April 18 ya shani htawng kata n-gun madun kasu kabrawng manghkang byin ai hta htawng sin balik ni kawn sanat gap nna masa shazim ai hta htawng masha marai (4) daram asak si sum mat nna marai 10 jan hkala ai lam chye lu ai.

Manghkang n pawt gaw Myen shaning n nan shani htawng masha shalawt ai hta tara rap ra ai lam n nga ai majaw April 18 ya shana n-gun madun manghkang byin ai re hte htawng sin balik ni kawn sanat gap shazim ai majaw htawng masha asak si sum ai madang byin ai re lam Myitkyina htawng hte ni htep ai masha langai tsun ai re. “Htawng masha ni gaw ( ဒို့အရေး,ဒို့အရေး) nga marawn ai, dai shaloi htawng sin balik ni gaw sanat gap na masa shazim kau ai” nga nna tsun ai.

Htawng makau hku lai hkrup ai mung masha langai mung shi lai hkrup ai aten na masa lam hpe ya na zawn tsun ai. “Shana de ngai lai hkawm ai aten masa lam gaw zim taw sai, htawng masha marai mali manga daram hpe myi man hpe sumpan hte magap na dung shangun da ai gaw mu dat ai, shahte hpe san jep taw ai masa rai na re” nga nna tsun ai.

Si sum mat ai htawng masha ni hte hkala hkrum ai ni hpe Myitkyina tsi rung kaba de htawng masha htaw mawdaw ni hte woi mat nna tsi rung kaw shimlam shaja da ai re hpe mung chye lu ai. April 17 ya shani hta myen hpyen dap gaw htawng masha shalawt ai lam galaw ai hta Myitkyina htawng kaw nna htawng masha marai (42) shalawt ya ai re lam RFA shiga hta tang madun da ai kaw na chye lu ai. April 17 ya shani shalawt hkrum ai hta KBC ningbaw Usa Rev. Dr Hkalam Samson mung lawt pru wa ai raitim lawt pru ai hpang hkying hkum (24) n hpring shi ai aten hta san jep ra ai lam nga ai nga nna bai rim woi mat ai re hpe mung chye lu ai.