Myitkyina Muklum Hta Lani Mi Laman Mawdaw Cycle Adawt Manghkang 3 Lang Daram Nga Ai Lam

Pajau Media

December 11, 2025

Myitkyina Muklum kata lani mi laman hta sha Mawdaw Cycle a dawt manghkang 3 lang daram nga ai hte marai 1 gaw asak si sum ai lam Myitkyina Shinggyim nau na garum hpung ni kaw na chye lu ai.

December 9 ya shani hta sha Dap Kawng Naing Star Sau Seng makau kaw mung Cycle adawt manghkang byin ai sha n-ga Yan Gyi Awng Htoo Sau seng kaw mung cycle adawt manghkang byin ai lam chye lu ai.

Accident byin ai hta la langai hte amyu shayi 2 daram hkala ningma lu ai lam chye lu ai. Dai sha n-ga N jang Dung, Manhkring, သားအဖ ၃ ယောက် lam braw kaw mung Mawdaw adawt manghkang byin nna mawdaw gau ai La langai asak si sum ai lam chye lu ai.

Dai la wa gaw December 9 ya jahpawt daw hkying 2 jan aten kaw Crown mawdaw ahpraw hte rai nna mawdaw chyang shadang nlu hkang mat ai majaw Wan shadaw hpe adawt nna dai shara kaw nan asak si sum mat ai re hpe chye lu ai.

Jep joi yu ai hta Tsa lu shalai nna Mawdaw hpe ladu lai chyang hkra gau ai hta mawdaw Break hten mat ai re lam, dai majaw Maw daw, Cycle gau hkang nga ai aten tsa lu tsa sha nna gau ai lam n galaw na matu shinggyim nau na garum hpung ni tsun da ai re.

Myitkyina muklum hta mawdaw cycle adawt manghkang jahkring hkring byin nga ai rai nna December 7 ya hkying 8 :15 aten daram hta Mye Myint Mai Te Kwi makau kaw mung cycle adawt manghkang byin ai re hpe mung chye lu ai.

Shiga – Zau