Myitkyina Muklum Kata Amyu Shayi Ni Hpe Damya Mya Ai Lam, Mazut Roi Rip Manghkang Ni Byin Law Ai Lam

Pajau Media

December 31, 2025

Myitkyina Muklum kata shana aten mung masha ni shim lam n nga damya manghkang, amyu shayi mazut roi rip mabyin ni law ai majaw grai sadi maja ra ai lam chye lu ai.

N dai shata laman hta shana hkying 7, 8 ​hkan lai wa lai sa galaw ai amyu shayi ni damya mya hkrum nna atik a nang rim woi hkrum nna mazut roi rip hkrum ai mabyin ni hkrum sha ai majaw grai sadi maja let sha hkawm sa ra ai lam ginra masha ni tsun ai re.

Lai wa sai December 24,25 ya laman hta mazut roi rip manghkang byin ai chye lu ai. Mabyin gaw December 25 ya shana hkying 8 :30 aten daram hta asak 21 ning re ai ramma shayi sha hte hpaw mi 2 gaw cycle langai kaw sha jawn nna Japan Mahkrai hku lai wa yang myi man magap da ai la marai 6 kawn hkap jahkring nna arung arai mya la kau nna asak 21 ning re ai mahkawn hpe mazut roi rip ai lam chye lu ai.

Damya hpung ni gaw sinat lang nna jahkrit shama, sinat kapaw ai lam ni galaw ai lam, Myitkyina Muklum kata nga mung masha ni gaw shimlam n nga hkrit tsang let sha hkawm sa ra ai lam chye lu ai.

Lahta na mabyin hte seng nna Balik Dap kaw amu hpaw da ai lam chye lu ai. Myitkyina Muklum kata uphkang nga ai asuya kawn mung muklum kata shimlam hpe ahkyak la ai lam n nga ai, lagut damya manghkang ni hpe lit la hparan ai lam n nga ai majaw muklum kata n dai zawn re ai manghkang ni lani hte lani grau grau sawng wa ai re hpe mung chye lu ai.

Shiga- Pyilan U