Myitkyina muklum kata damya mya ai lam n dai laman byin law ai lam

Pajau Media

June 30, 2025

Shuk shanut nga ai Mung masa lapran Myitkyina Ginra kata Lagut damya manghkang grai law wa ai hte n dai hpang daw de Masha law law hkawm sa nga ai Lam kaba hkan shani ka-ang damya mya ai lam ni byin law nga ai nga nna Myitkyina ginra masha tsun ai.

N dai laman Damya mya hkrum ai amyu shayi langai tsun ai hta “ ya hte shani ngai battery cycle gau ngwi sha jawn na Myo de arai sa mari ai, cycle shawng kaw gumhpraw sumbu bang da ai, dai wa Cycle jawn ai La kasha lahkawng ngai na makau ganip wa na shaw la mat ai, ngai mung kajawng na marawn na mung n dum mat, dai pyi Myitkyina Lung Seng shadun da ai shawng hte kaw byin ai re, masha dai ram lai wa lai sa law taw shara kaw pyi byin ai, grai hkrit ra mat sai shani rai tim grai sadi na hkawm sa ra sai” nga nna gumhpraw sum bu gashun katut ai amyu shayi tsun ai re.

Gumhpraw sumbu kaw Sen Mali hte miwa gumhpraw 300 lawm mat ai, Myitkyina ginra kata lagu lagut manghkang ni grau law wa ai, ahkyak na hkawm ra yang manang langai ngai hte le yang kaja ai nga nna mung tsun ai re. N dai laman myitkyina ginra kata Ja Na dan gang di la lam ni, Masha hpe n htu gahtam nna cycle gashun la ai mabyin ni Facebook gang hkau ntsa hta mu mada lu ai re.

N dai zawn re hkawm sa hkawm wa lam hta Damya Mya hkrum ai hta amyu shayi ni law malawng byin hkrum ai re majaw amyu shayi ni langai hkrai hkawm sa ai lam galaw yang grai sadi maja ra ai lam ginra masha ni tsun ai kaw na chye lu ai.

Myitkyina muklum kata n dai zawn re ai lagu magut manghkang ni kade law nga ai raitim lit nga ai Balik ni kawn mung lit la hparan ya ai lam n nga ai majaw tinang a shimlum lam hpe tinang lit la ra ai. Grau nna gaw Mung masha hpe makawp maga ai asuya n nga ai re majaw ginra kata Ka-ni lu sha masha ni mung grau grau law wa ai masa hta Lagut damya manghkang ni mung grau law wa ai re hpe chye lu ai.

Waimaw Mai na ginra kata hta mung Ka-ni Lu sha masha grai law wa ai hte Lam braw shara hkan N htu hpai damya hkap mya ai lam ni nga wa ai majaw Mai Na ginra kata hta mung hkawm sa hkawm wa grai sadi maja ra ai nga nna ginra masha ni tsun ai kaw na chye lu ai.

Shiga- Pyilan U