Myitkyina Muklum Kata July Shata Kaw Nna Cycle Rim Hpang Na Lam Ndau Laika Shapraw Ai Lam

Pajau Media

1 July, 2025

Jinghpaw mung Myitkyina Muklum kata Mawdaw cycle jawn ai ni hkan sa ra na tara ni hpe hkan sa nna cycle jawn ra na lam Mawdaw cycle gawn hkang balik ni n dau laika shapraw wa ai re.

Sadi jaw n dau laika hpe hkan sa ai lam n nga ai cycle jawn ai ni hpe mu ai hte Upade hte maren ahkyak la sa wa na re lam tsun da ai re.

Sadi jaw n dau laika hta “ cycle jawn yang cycle gup chyawp hpe atsawm shimlum hkra chyawp da ra na lam, cycle langai kaw masha lahkawng hta lai na jawn ai lam n galaw na, battery cycle ni mung Numbat Pya shakap ra ai lam, cycle pat lawm ra na hte cycle shawng hpang wan hpaw na gau ra na, cycle hta gunrai ladu lai htaw ai lam n galaw na hte cycle License nga ra na lam ” tsun da ai re hpe chye lu ai.

Tara n hkan sa ai ni hpe hpe July shata kaw nna ahkyak la rim hpang sa na re lam, May shata hpang jahtum na bat kaw nna hpang n htawm License n lawm ai mawdaw ni hpe rim hpang sai rai nna July shata kaw nna gaw Cycle ni hta mung masat da ai Numbat n shakap da yang rim sa wa na re lam tsun da ai re.

N dai laman Myitkyina Muklum hta License n lawm ai Mawdaw ni hpe shani aten hte shana daw hkying 8:00 PM hpang daw rim ai lam galaw nga dingyang re hpe mung chye lu ai.

Shiga- Hpring