Myitkyina Muklum Kata Kachyi Gashun Ai Mang Hkang Matut Byin Nga Ai Lam

Pajau Media

March 4, 2026

Junghpaw Mung Myitkyina muklum hta ndai laman lagu lagut, damya mya ai mang hkang ni grau law wa ai sha n-ga lam kaw gashun gashe mabyin manghkang ni mung matut byin nga ai lam Myitkyina ginra masha kawn tsun ai re.

Mani March praw 3 ya shani hta Aye Zay Ti lawk kata amyu shayi lahkawng jawn wa ai cycle hpang kaw na la lahkawng hkan nang wa nna kachyi gashun nna hprawng mat ai hpe chye lu ai.

Myitkyina ginra masha langai mung "yahte kalang ngai na manang langai mung wunkat sa ai lam hta damya ni cycle jahkring nna kachyi gashun mat ai. Myitkyina kata dan re mabyin ni na ai gaw jahkring hkring re Myitkyina kaw gaw shimlum lam nnga sai” nga tsun ai.

Dai amyu shayi sha mung jahpawt hkying 7 wunkat sa ten Miwa jawng makau du hta cycle jawn sa wa ai la lahkawng kawn kajawng kaja cycle shawng kaw tsap na masha hpe ganawng kau nna gashun mat ai re.

Ginra masha ni gaw Myitkyina muklum kata hpai da wang law law hpaw wa ai majaw mung nhkru nkaja ai mang hkang ni law wa ai, nta kata du hkra shang lagu ai ni cycle gashun ai, kachyi, grumhpraw sumbu hte phone hte kaga manu hpu ai arai ni gashun ai mang hkang ni jahkring hkring byin nga ai hpe chye lu ai.

Shiga - Zau