Myitkyina Muklum Kata Lagut Damya Galaw Ai Masha Ni Wuhpung Hku Pawng Nna Galaw Sha Wa Ai Lam

Pajau Media

September 2.2025

Mung masa shuk shanut ai hte tam lu tam sha yak wa ai masa hta Muklum kata shimlum lam n nga ai sha n-ga Lagut damya a rai gashun manghkang ni mung lani hte lani byin law nga ai re.

Myitkyina Muklum hta mung damya mya ai lam, arai gashun manghkang ni jahkring hkring byin nga ai re hte lagut damya mabyin hpe yu yang n-gun ja asak ram ai ramma ni law wa ai re lam chye lu ai.

Ginra masa lam hte seng na ginra masha langai tsun ai hta "shara shagu kaw cycle mat ai, sdup gayet nna arai gashun la mat ai nga shiga ni chyu, grai shimlam n nga sai, shani hkan cycle jawn taw tim galoi wa ngai hpe hpang kaw na wa adup na kun ngu hkrai maja ra, myit ru ai, mai byin ai daram masha lai wa lai sa nau n nga ai de marai langai hkrai hkawm sa ai lam gaw n galaw yang kaja ai" nga nna tsun ai re.

Ginra shiga ni hkan tang madun da ai hta Myitkyina Muklum kata August shata laman lagut damya manghkang (7)lang byin ai re hte damya mya hkrum ai hta n-hkyi galun manghkang a majaw La marai(1) asak si sum ai lam tang madun da ai.

Lagut damya ni gaw wuhpung hku nna nga ai hte shara garan nna shana aten hkan cycle lagu hkawm ai lam ni galaw ai re lam, n dai masa lam ni a majaw Myitkyina Mile 10 ginra kata hta Mare masha ni lit la nna shana aten sin kawp la ai lam ni galaw ai re hpe mung chye lu ai.

Muklum kaba ni hta myen hpyen dap uphkang wa ai hpang kaw nna uphkang masa ni hten za mat ai majaw lagut damya manghkang gaw grau grau law wa ai re.

 Mung masha ni gaw lit nga ai asuya kawn mung Muklum kata lagut damya manghkang hpe atsawm ahkyak la na matu ra sharawng nga ma ai raitim ya aten Mawdaw Cycle, rim jep ai lam hpe sha ahkyak tawn na galaw nga ma ai a n tsa Mung masha ni n ra sharawng nga ma ai re hpe mung chye lu ai.

Shiga - Pyilan U