Myitkyina Muklum Kata License Nnga Ai Mawdaw Rim Masu Ai Lagut Damya Ni Nga Wa

Pajau Media

20 June 2025

Jinghpaw Mungdaw Myitkyina Muklum hta myen hpyen dap kawn License nnga ai madaw hpe rim hpang wa ai hpang mawdaw ni hpe rim ai masha hku masu sha taw ai lagut damya ni law wa ai hpe Myitkyina ginra masha ni tsun ai kawn chye lu ai.

“ Ya License nnga ai mawdaw ni hpe rim hpang wa ai hpang dai hpe ahkang la nna mawdaw ni du hkra damya mya wa ai . Nnan gaw hpyen la ni shadu ai hkum rai mayu damya ni re hpe hpang e she chye ai” ngu Myitkyina ginra masha langai tsun ai.

Mi nnan gaw Cycle hte laga arai ni hpe sha lagut damya ni madung damya mya la taw ai rai tim ya hpang daw de gaw hpyen la ai kaw na Licese nnga ai mawdaw cycle ni rim taw ai hpe ahkang la nna mawdaw rim ai masha zawn galaw nna jahkring jep ai hte gashun gashe wa ai hpe chye lu ai,

“Shanhte gaw shana yup tung kaw dapkawng hpung gyi jawng lam hkan la taw nna jep ai zawn galaw ai sinat mung lang ai rai tim hpyen dap ni lang ai baw nre . Mi man gaw hkrit si na zawn anhte marawn dat yang she makau grup yin hkan na masha ni le wa yang she mai wa sai da, kani ya ni rai sam ai “ ngu lahta na ginra masha tsun ai.

Dai zawn masu taw ai lagut damya ni gaw shana hkan lam jut shara hkan hta la tsap taw nna jahkring jep ai, sinat lang nna jahkrit ai nkau ni gaw hkrit si na zawn re mi man hte shaga ai ni galaw ai ngu tsun ai.

Myitkyina muklum hta up hkang ai ladat hten wa ai kawn lagut damya mya ai lam ni jahkring hkring byin chye ai hta ndai laman License nnga ai mawdaw ni hpe rim taw ai hpang shana hkying 8 hpang, mi na hta lagut damya ni grai sawng hkra law wa nna lawk kaw na lam jut shara hkan du hkra shani shana nga taw ai.

License nnga ai mawdaw ni hpe rim taw ai gaw Myitkyina muklum hta sha n-ga Monyin, Mogawng, Nammati hte laga ginra ni hta mung rim taw ai re.

Dai hta n-ga jinghpaw mungdaw hta June shata bat nnan kaw nna License nnga ai mawdaw ni rim taw ai re majaw mawdaw sara ni hte bu hkawm masha ni hkawm sa hkawm wa yak ai sha n-ga maga mi hta mung hkauna galaw ai ni, jawng sa jawng wa galaw ai ni bu hkawm mung masha ni lam shagu hta yak taw ai hpe chye lu ai.

Shiga-Hpring