Myitkyina Muklum Kata Maigan Pru Hkawm Ahkang Passport Laika Buk Galaw Ai Lam Hpe Ya Aten Tsun Jahkrup Da Ai Aten Hta Grau Jau Galaw Ya Nga Sai

Pajau media

May 5.2025

Jinghpaw mung Myitkyina Muklum kata maigan pru hkawm ahkang Passport laika buk galaw ai lam hta aten na na la ra ai kaw na ya aten tsun jahkrup da ai aten hta grau jau galaw ya nga sai re lam Myitkyina Passport rung kaw na chye lu ai.

“Shawng na lang hta gaw Passport rung pat mat ai aten hta mung rung n pat shi ai kaw na galaw da sai ni gaw aten grai na hkra la ra mat ai. Dai majaw grai sum machyi mat ai, raitim ya aten laika buk hpe lawan ladan lu hkra galaw ya nga sai,” nga nna tsun ai.

Passport rung n pat shi ai aten mying jahpan bang da ai ni gaw rung pat ai majaw aten grai na hkra la kau ra ai. Aten grai sum machyi mat ai hpe bai myit ya ai hku na shawng na hta lawan lu hkra galaw ya nga sai re lam chye lu ai. N dai hpang daw de Passport galaw na matu jahkrup da ai aten hta jau nna jaw nga sai re hpe chye lu ai.

Lai wa sai 2024 July 21 ya kaw nna Jinghpaw mung kata Phone Internet matut mahkai lam ni yawng dawm jahkring kau ai majaw Mungdan lai hkawm ahkang laika buk Passport galaw ai lam Myitkyina ginra hta hkring ra mat ai re.

Dai hpang Passport galaw na matu Jinghpaw Mung kaw nna Yangon Mandalay ni de sa galaw ra ai re, raitim October 14 kaw nna Passport hpe Myitkyina kaw bai galaw ya nga sai raitim Internet mayak a majaw jahkrup da ai aten hta lai hkra la ra ai lam ni byin lai wa sai re hpe chye lu ai.

Shiga- Hpring