Myitkyina Muklum Kata Mawdaw Cycle Jahkring Hkring Rim La Kau Ya Nga Ai Lam

Pajau Media

Sep 4.2025

Jinghpaw Mung kata mawdaw cycle ni hpe gabaw amyu myu hte rim nga ai rai nna rim la hkrum ai cycle ni hpe bai n jaw ai sha zing la kau ya ai lam Myitkyina ginra masha ni tsun ai.

"Ngai na cycle gaw Battery cycle re, Lisence No. Pya n lawm ai majaw rim zing la kau ya sai, gara hku tsun tsun n lu sai, gumhpraw hte mung n mai shaw la, lani mi kaw cycle 5 ram hpe zing la ai, n kau gaw hkrap na tsun tim n lu ai, Mung masha ni yak yak hkak hkak re mari da ai hpe aloi sha zing la kau ya ai gaw n byin ging ai rai nga, dam lama ma jaw tim mai ai re wa" nga nna Myitkyina ginra masha langai tsun ai.

Cycle ni hpe masat da ai No. Pya nga n nga, cycle gupchyawp, shingdu yu pat hte gau hkang Lisence ni hpe jep joi ai re hte cycle n kau hpe gaw hkap rim ai ni nan la kau ya ai re lam chye lu ai.

Mung masha ni gaw shanhte masat da ai tara hte hkrak rai yang n rim ai ngu hkam la da ai raitim gabaw amyu myu shadut nna eim nga ai majaw hkawm sa hkawm wa yak hkak dut dang nga ai re.

Myitkyina Muklum lam braw shara ni hkan Jahpawt daw hkying 9,10 aten daram kaw nna mawdaw cycle gawn hkang ai hpung ni shani shagu hkap rim nga ai re. Lai wa sai ten hkan gaw rim hkrum yang gumhpraw mun masum daram hte mai shangut ai raitim ya gaw cycle nan zing la kau ya ai re lam chye lu ai.

Cycle gau ai wa gaw gau ahkang lisence lu da ra na hte gupchyawp lawm ra na, shingdu yu pat lawm ra na, cycle kaw marai lahkawng hta lai na n htaw mai na tara hpe lai wa sai July shata hta myen hpyen dap asuya shapraw lai wa sai re.

Shiga - Htu Seng