Myitkyina Muklum Lam Braw Hkan Aten Ntam Myen Hpyen Dap Shara La Jep Joi Ai Lam Grau Law Wa Ai Lam

Pajau media

September 22, 2025

Hpyen masa shaja ai gaw lani hte lani sawng wa ai hta Myen hpyen dap hpung ni gaw Mung masha law law shanu nga ai Muklum kata shamu shamawt jep joi ai lam n dai laman grau galaw wa ai nga nna Myitkyina ginra masha langai tsun ai.

“N dai laman gaw grau jep ai, shanhte jep ai hpe yu yang yawng hpe jahkring na jep ai gaw nre, shanhte lama ma tam ai hku she re, shanhte shiga lu da na masha tam ai masa hku she re, ya gaw cycle gaw rim ai hte kajawng kaja hkap jahkring ai zawn re ai ni bai katut, galoi ma myit tsang let sha hkawm sa ra taw nga ” nga nna Myitkyina ginra masha langai tsun ai re.

N dai hpang daw de Muklum kata shani shana aten ntam jep ai sha n-ga Muklum kata shamu shamawt ai lam grau galaw wa ai re. September 22 ya jahpawt daw hta gaw PLN Trinity Lam braw kaw mung grai jep nga ai lam ginra masha ni tsun ai re.

Ra Da Kawng maga de mung Lam braw hkan shara la nna jep joi ai hta Phone hpe madung jep nna Massenger, Wechat , Telegram, Viber hkan du hkra ahkraw jep ai lam Ra Da Kawng kaw na ramma langai mung tsun ai re. “ Ra Da Kawng maga de gaw dingyang nga hkawm ai, ya gaw Phone grai jep ai, dai jep ai ni mung Jinghpaw laika ni pyi grai chye hti ai lu, Myen Ga she shaga tim grai n loi mat sai, grai sadi maja ai gaw n lai ai” nga nna tsun dan ai re.

Myen hpyen dap gaw n dai hpang daw de hkrun lam hkawm ai ni hpe sha n-ga Muklum kata hkawm sa hkawm wa ai ni, shanhte dingyang dung nga ai Balamin Htin shagyit hkan mung masha n-gun jat na shamu shmawt ai lam grau galaw wa ai re.

Lai wa sai September (14) ya shani hta mung Mung masha lai wa lai sa law ai Myitkyina Muklum San Pya lam ntsa kaw masha lahkawng hpe gap sat ai manghkang ni byin ai majaw Myitkyina ginra masha ni shimlum lam a matu grai hkrit tsang let sha hkawm sa nga ai lam chye lu ai.

Shiga – Pyilan U