Myitkyina N Bungli Pa Pat Da Ding Yang, Lawan Bai Mai Hkawm Sa Na Matu Mung Masha Ni Ra Sharawng Ai Lam

Pajau Media

10 March 2026

Jinghpaw Mung, Myitkyina n bungli pa pat da ding yang re ai majaw ahkyak hkawm sa ai mung masha ni a matu mayak nga nna lawan bai mai hkwam sa lu na matu alawan lajang ya na hpe mung masha kawn tsun ai.

Ya ten Myitkyina n bungli pa hta bu hkawm n bungli nhkawm ai rai tim hpyen dap nbungli gaw hkawm taw ai hpe chye lu ai.

“Nbungli pa gaw ya du hkra pat da ai rai tim hpyen dap nbungli ni gaw shahte ra yang ra ai hku hkawm sa nga ma ai. Dai majaw dai bu hkawm nbungli hpe ma lu hkawm sa na matu lawan lajang ya yang hkrak ai” ngu mung masha langai tsun ai.

Myitkyina n bungli pa gaw lai wa sai February shata 20 ya shana FPV drone hte gasat hkrum ai hpang n bungli pa hpe jahkring gan pat da ai re.

Dai majaw Myen Hpyen Dap ni gaw Myitkyina n bungli pa hpe mung masha ni hkawm sa ai hte rai ni mai htaw na matu nbungli hpe shawoi na zawn sha bai mai hkawm lu na matu alawan sha lajang nga ai hpe Mungdan Makawp Maga hpung ni gaw February 23 ya shani ndau da ai.

Shiga-Hpring