Myitkyina Nang Zaw Lam Lapran Langu Htaw Mawdaw Ni Grai Chyat Nna Hkawm Sa Yak Nga

Pajau Media

July 5, 2025

Waimaw Ginra majan byin wa ai hpang Myen Hpyen Dap kawn myitkyina - Laiza hkawm sa lam kaba hpe pat kau ai majaw mung masha ni madung lai hkawm nga ai gaw Nang Zaw Lam gaw ya aten marang htu sawng ai nna hkawm sa yak nga ai lam chye lu ai.

Nang zaw Lam hku nna langu htaw mawdaw ni, buga de wa ai hpyen yen mung masha ni mung dai lam Hku nna sha madung lai ai re. N dai laman marang htu sawng ai majaw langu htaw mawdaw ni mung chyat nna gun rai htaw mawdaw ni mung lam kaw lahkawng na daram yup ra ai madang byin nga ai lam hkawm sa mung masha langai tsun ai.

"N dai laman gaw hkawm sa n mai ai ga re shawng daw de gaw cycle hkying hkum 3 daram sha gawt ra ai wa ya gaw hkying hkum 6 daram gau ra sai, gunrai htaw mawdaw ni langu htaw mawdaw ni grai chyat ai lapran hku sha madep lai ra taw ai, ya aten gaw hpyen yen ni law malawng mung dai lam hku sha arai htaw lahka ai rai nga ya gaw hkawm sa n mai ai madang byin taw nga" nga nna tsun ai.

Hkawm sa hkrun lam yak nga ai hta Myen Hpyen Dap P.T.Ts pawng hpawm Hpung ni mung lam dingyang shagyit dung nna gumhpraw hta sha ai gaw mai na hpyen yen camp makau du hkra re. Maina hpyen yen camp makau Kaw gumhpraw hta sha ai P.T.TS hpung ni gaw langu htaw mawdaw langai kaw sen sanit hpyi ai lam, gunrai htaw mawdaw ni hpe mung yawm htum mun manga lahta hpyi ai majaw gunrai htaw sha ai mung masha kade shaja tim tinang na matu n ngam ai nga tsun nga ma ai re.

Hkrun lam yak hkak ai hta lam dingyang jep joi shara shagyit law ai hte jaw kau ra ai law ai majaw ya aten gunrai htaw mawdaw gau sha kab bau nga ai mung masha ni grai Yak hkak nga ma ai re hpe mung chye lu ai.

shiga -Pyilan U