Myitkyina Nbungli Pa Hta Nbungli Lekmat Dut Ai Lam Pat Nga Ding Yang Re Ai Lam

Pajau Media

March 25, 2026

Myitkyina nbungli pa hte Putao nbungli pa mung lawm rai nna ahkyak ai nbungli pa ni hpe March 25 ya shani kawn bai hpaw na matu seng ang ai asuya dap kawn ndau da ai rai tim Myitkyina muklum hta gaw lekmat dut ai lam naw pat da nna nbungli hkawm ai mung nnga ai hpe chye lu ai.

Hkrum lam matut mahkai mayak a majaw n hkawm nmai hkawm ra ai Putao, Myitkyina, Kyengtung, Tachileik, Kawthoung, Kyawkpyu, Sittwe, Kalay, Homalin hte Hkamti shara hkan shawng madung tawn nna March 25 ya shani kaw na hkawm sa na hpe matut mahkai hkawm sa hkawm wa hte seng asya rung kawn ndau da ai re.

Rai timung Myitkyina nbungli pa hpe gaw May shata htum du hkra nbungli lekmat dut ai lam pat da ding yang re hpe nbungli lekmat dut ai masha kawn chye lu ai.

“Nbungli lekmat hpe May shata htum du hkra pat da ai June shata na sha hpaw da ai.Ndai laman gara hku bai byin wa na kun nchye. Masha ni online ntsa hkan dut taw ai gaw nga ai. Ya ten gaw masu ai masha ni mung nga ai” ngu tsun ai.

Myen mung kata nbungli hkrum lam law malawng gaw nbungli sau nlaw ai a majaw gan pat da nna mungdan kata nbungli hkrum lam ni mung shadawn sharam ai hku sha hkawm sa nga ai re.

Myitkyina nbungli pa hpe gaw lai wa sai February 21 ya shani kawn MNA nbungli gap gasat hkrum wa sai majaw pat da aten shata mi jan sai hpe chye lu ai.

Shiga-Zau