Myitkyina Nbungli Pa Kaw FPV Drone Wa Gap Hkrum Ai Nga Nna Myen Hpyen Dap N Dau

Pajau Media

February 13, 2026

Myitkyina Muklum nbungli pa kaw February 12 jahpawt daw hta FPV hpan Drone wa gap ai lam byin ai nga nna Myen hpyen dap tsun n dau da ai re hpe chye lu ai.

“Shawoi gaw shana hkying 7 kaw na 8 du hkra nbungli n sen ni na nga ai raiitm mana de kaw nna gaw nbungli n sen n na sai” nga nna Myitkyina ginra masha tsun ai re.

KIA hte PDF pawnghpaw hpung ni Myitkyina nbungli pa makau grup yin shara ni de FPV hpan Drone wa gap gasat ai lam n dau da ai rai nna dai htim gasat ai lam hpe ntsa hpyen makawp maga ai jak rai hte sagawn la lu ai hte Drone hpe mung ninghkap kau lu ai lam ndau da ai re.

N dau ai kaw Drone kade re ngu ai hpe n dau ai lam gaw n nga tim Drone taw ai shara hpe ganghkau shi laika man ni hta tang madun da ma ai re hpe chye lu ai.

Ganghkau shiga laika ni hta tang madun ai gaw February 12 ya shana daw nbungli hkawm sa lam yawng jahkring da ai re lam, nbungli bai hkawm na lam hte seng nna mung atsawm shagrin la ngut ai hpang she bai tsun n dau na re lam ginra masha ni tsun nga ma ai re.

Waimaw hpyen man maga de mung gasat gala majan laja nga ai hte Myen hpyen dap gaw shani shana laknak kaba gap karum nga dingyang re lam chye lu ai.

Shiga – Hpring