Waimaw Hpyen Man Maga De Majan Laja Nga Ai Majaw Myen Hpyen Dap Gaw Bala Min Htin Mahkrai Kaw Masha N-Gun Jat Da Ai Lam Galaw Nga

Pajau Media

February 13, 2026

Waimaw ginra makawp Myen hpyen dap Hk.L.Y (58) de ya aten gasat gala majan laja nga ai re hte Myen hpyen dap gaw M.P.Hk hte Man Pya Tawng maga kaw nna mung laknak kaba laja lana gap garum nga dingyang re hpe mung chye lu ai.

“Laknak kaba nsen mung shani shana aten tup ngoi ai, Mana yup tung kaw mung Man Pya Tawng kaw nna gap bun ai re, Wan gala ai pyi mu ai, Bala Min Htin mahkrai kaw mung hpyen mawdaw lahkawng hte masha n-gun hpring hpring shajin da ai, majan laja wa ai majaw mahkrai sin n-gun jat ai kun rai na re” nga nna ginra masha tsun maram ai re.

Bala Min Htin mahkrai kaw hpyen mawdaw lahkawng lam kaba makau kaw jahkring da ai majaw hkawm sa hkawm wa lai sa lam grai chyat ai lam ginra masha matut tsun dan ai kaw na chye lu ai.

February 13 ya hkying 11 aten daram hta mung Waimaw ginra Tar Law Gyi mare kaw nbungli wa gap ai lam nga ai re hte mung masha hkra hkala ai lam nga ai re raitim masa tup hkrak gaw matut sagawn nga ai re.

Waimaw hpyen man maga de February 12 ya jahpawt daw daram kaw nna KIA pawng hpawm dap ni gaw HK.L.Y (58) dap hte Man Pya Tawng maga de htu shadut htim gasat nga ai re hpe mung chye lu ai. Myen hpyen dap gaw MI 35 nbungli hte bawm wa jahkrat gasat nga ai re.

Myen hpyen dap kawn nbungli bawm wa jahkrat bun ai majaw mung masha ni nga ai mare hkan wa hkrat ai lam na lu ai hte mung masha hkra hkala ai lam nga n nga matut sagawn nga dingyang re.

Ya aten Jinghpaw mung hta Waimaw hpyen man sha n-ga Manmaw, Hpakant, Danai ginra hkan mung majan masa grai laja nga ai hte hpyen laknak a majaw mung masha si hkala hkrum ai lam shani shagu byin nga ai lam mung chye lu ai.

Shiga – Pyilan U