Myitkyina Putao Lam Pat Ai Hpang Myen Hpyen Dap Hpyen Garum N Bungli Du Ai Lam

Pajau Media

October 24, 2025

Myitkyina Putao hkawm sa hkrun lam hpe Myen hpyen dap kawn Lamung Zup gate kaw pat kau ai hpang Myen hpyen dap Hpyen garaum Nbungli gaw Putao ginra de du shang ai lam chye lu ai.

" Dai ni lani mi laman sha Myen hpyen dap hpyen garum Nbungli Y8 masum lang sa ai, dai gaw Laknak malu masha htaw ai rai na masa nga, Myitkyina Lam mung pat sai re nga yang gaw dai gaw ang katut ai lam gaw n mai byin ai, Putao ginra masha ni grai sadi ra sai" nga nna tsun ai.

October 23 kaw nna Putao Myitkyina hkrun lam hpe Myen hpyen dap pat kau ai hpang, Myen hpyen dap Y8 Nbungli gaw Putao Nbungli Pa kaw 3 lang wa hkring ai re.

Hpyen masa grai laja wa mai ai majaw ya aten Putao ginra masha ni grai myit tsang nga ma ai re hpe mung chye lu ai.

N dai shata laman Myitkyina Putao lam mayan hta gasat gala byin ai sha n-ga Hkawng Lang Hpu ginra maga de mung Myen hpyen dap shara 2 hpe Rawt malan hpung ni zing madu da sai re hpe mung chye lu ai.

Shiga- Mali Hku