Myitkyina-Putao Mawdaw Hkrun Lam Hta Mawdaw Langai Krung De Hkrat Mat Nna Masha Asak Si Sum Ai Lam

Pajau Media Channel

8th March,2024

Putao kaw nna Myitkyina de March (5) ya shani yu wa ai mawdaw langai gaw Zanan Hka mayan hte kaw krung de hkrat mat nna mawdaw gau ai wa asak si sum mat ai re hte moi mang hpe March ( ya shani she seng ang ai ni kawn sagawn hta la lu ai lam chye lu ai.

Asak si sum mat ai wa gaw AG DC (5) Putao ginwang daw na ningbaw Sara kaba Je Ye Naw (ဂျေရဲနော့) re hte sr kaba gaw lai wa sai March (5) ya shani Myitkyina de kasha ni hpe wa tau na matu sa wa ai kaw matut mahkai n lu mat ai re hte sagawn yu ai hta Sumpra bum lai Su Yang Mare Zanan Hka mayan kaw mawdaw hte hpawn krung de hkrat mat nna asak si sum mat ai March (7) ya shani shiga na ai hte Putao Hkan Di shinggyim nau na garum hpung ni hte rau AG DC (5) na lit nga ai salang ni sa nna moi mang hpe March ( ya shana daw hta Putao de shadu la lu sai lam AG DC (5) ginwang na lit nga salang langai tsun ai.

“Sara gaw Putao kaw nna ginwang hte seng ai zuphpawng ngut ai hpang shani shi hkrai sha nta jawn mawdaw hte Myitkyina yu mat ai re, shi di hkrat mat ai shara gaw lam hpung gaw mung n ang ai, hkrun lam mung a ding sha re, gara hku na lam lawu de hkrat mat ai ngu anhte ma nlu maram ai, shi hkrai sha re ai majaw yup nga nga ai kun n chye tsun mat sai, ya gaw a ngwi apyaw hte Putao de shadu la sai.”

Sara kaba Je Ye Naw (ဂျေရဲနော့) asak (62) ning gaw ma manga a kawa mung rai nna Putao ginra AG DC (5) ginwang kaw mung ningbaw magam lit hpe gunhpai ai sara kaba re sha n-ga Myen mungdan AG hpung ginjaw hta mung Komiti malawm langai hku nna bungli galaw nga ai sara kaba re hpe mung chye lu ai.