Myitkyina Putao Mawdaw Lam Pat Ai Sha N-ga Nbungli Hkrun Lam Mung Chyat Nga Ai Lam

Pajau Media

November 6.2025

Myitkyina Putao Mawdaw hkrun lam pat da ai sha n-ga Nbungli Lakmat lu na matu mung yak ai majaw Dakkasu Jawng ma ni wa lam n mu yak hkak nga ai lam chye lu ai.

"Putao maga kaw na Dakkasu wa lung ai ni law malawng chyat nga ma ai, Nbungli shara mung n lu mat sai, November shata htum du hkra shara hpring mat sai, yu wa maga gaw loi tim lung wa maga gaw lu na grai yak ai, shawng shata kaw na hkawm sa ahkang pat da ai re, ya gaw dingyang lung ai mawdaw lam hpe du hkra pat kau sai" nga nna Putao kaw na Myitkyina de Dakkasu san poi wa htai ai Jawngma tsun ai .

Myitkyina Putao hkrun lam n pat shi ai aten kaw na Jawngma ni hte Asak 45 n pu na ni hpe hkawm sa ahkang pat da ai majaw Ramma ni gaw Nbungli hkrun lam hpe sha madung tawn hkawm sa nga ma ai re. Raitim Nbungli Lakmat Sen mi hkawt manu bai rawt wa ai majaw Jawngma ni yak hkak nga ma ai lam chye lu ai.

" Lakmat langai kaw Sen Mali jan hte lu ai, ya gaw Sen 5 jan mat sai, San Poi ngut ai hte Mawdaw lam bai pat ai aten ang ai majaw hkrun lam hkawm masha grai law ai, Lakmat gaw n lu rai na chyat taw nga" nga nna mung matut tsun ai re.

Lai wa sai October 23 ya shani Myitkyina Putao Mawdaw lam hpe pat da ai hpang Nbungli Lakmat ni manu grai tsaw mat ai re sha n-ga November htum du hkra shara n lu sai majaw Jawngma ni wa lam grai yak hkak nga ma ai re.

N dai shata laman Dakkasu Jawngma ni lung dat yu dat galaw nga ai aten ladaw mung re ai sha n-ga Putao ginra hta mung Hkauna Mam ni dan la ai aten ladaw mung rai nna grai ginchyum chyat nga ai aten ladaw mung re. Ya aten hkrun lam hkawm sa masha ni mung grai chyat nga ai sha n-ga Nbungli hkrun lam mung n dai shata htum du hkra na matu shara hpring mat sai re hpe chye lu ai.

Shiga - Malihku