Myitkyina San Pra Lam Na Hkam Ja lam Ginsup Shara Kaw Ramma Marai (10) Jan Rim Hkrum

Pajau Media Channel

29th March, 2024

Myitkyina Sanpra lam ntsa kaw nna hkam ja lam ginsup shara kaw March 28 ya shana Hkying (6:00) daram hta ramma mahkawn marai (5) hte shabrang (10) jan daram hpe rim woi mat ai lam ginra masha ni tsun ai kaw na chye lu ai.

Sanpra lam ntsa na Alpha mying ai ginsup shara kaw shinggan bu hpun palawng hpun da ai mying n chye lu ai hpung ni gaw mawdaw lahkawng hte ginsup shara kata de shang nna nan rim woi mat ai re nga nna ginra masha langai tsun ai.

“shana de hkying (6) daram hta rai nga dai ginsup shara shawng hku nna lai hkrup ai dai kaw masha grai majaw taw ai zawn re na yu dat yang ramma ni hpe dingren da nna rim woi taw ai, yawng marai (10) jan daram nga ai” nga nna dai makau hku lai hkrup ai mung masha langai tsun ai re.

Myo mare kata Myen hpyen dap kawn mung hpyen magam n-gun n mai Upadi hpe hkrang shapraw galaw wa nna nta di laika shadu wa ai March (17) ya hpang kaw nna Malu masha seng, Kara zen seng, Ginsup shara zawn re ai hkan nga ai ramma ni rim hkrum ai lam jahkring hkring byin ai lam shiga ni na lu nga ai re. Ya aten ginsup shara hte lu sha seng n kau gaw sa n-gun jaw taw ai Mung shawa ni a shimlam hpe myit ya ai majaw jau tau pat kau ai zawn re ai ni galaw nga ai re hpe mung chye lu ai.

Jinghpaw mung ginra de lai wa sai March (7) ya kaw nna htu shadut majan baw gala byin nga ai aten mung re hte ya aten lahkawng maga kawn hpyen lahkawn ai lam ni galaw nga ai re lam mung tsun ai re. Myen hpyen dap maga kawn mung upadi n nan shagrin wa ai hpang kaw nna nta de laika shadu shaga ai lam ni galaw nga dingyang re hpe mung chye lu ai.