Myitkyina Tsi Rung Lam Braw Lam Ntsa Hkan Ka-Ni Htu Ai Masha Ni Wang Lu Wang Lang Galaw Nga Tim Ahkyak La Ai Lam N Nga

Pajau Media

22 July 2025

N dai hpang daw de Myitkyina Muklum Ka-ni lu sha dut hpaga, lu sha jai lang ai masha ni hpe lit nga ai asuya kawn mung ahkyak la ai lam n nga ai majaw Ka-ni lu sha jai lang ai masha ni gaw Mung masha ni lai wa lai sa lam ntsa hkan du hkra Ka-ni htu jai lang ai lam law wa ai re nga nna myitkyina ginra masha langai tsun ai re.

“ Ka-ni ya ni gaw Lam n tsa hkan kam ai hku lu sha jai lang pyi n kam yu ai, grau nna Wuhpung hku nga nna lu sha ai gaw Myitkyina Golf Pa shawng kaw na Ka-ni dawn dabang makau hkan, ngut na Tsi Rung (ရင်ခွဲရုံ) lam kaw rai nga, dai ni lai wa yu uang mung Lam ntsa kaw nan marai lahkawng Ka-ni htu taw, kadai lit n la ai ga re ” nga nna shi mu mada ai lam hpe tsun dan ai re.

Myityina Muklum Ka-ni dawn dabang shawng kaw gaw မက်သာဒုန်း htuk sha ai ni da n htuk sha ai ni da rai nna dingyang masha kamawng nga ai re hte dai shara kaw nan shada matut mahkai nna Ka-ni dut mari nna dai lam makau hkan sha lu sha htu ai lam ni galaw nga ai re hpe mung chye lu ai.

Ka-ni lu sha masha ni gaw Mung masha ni dingyang lai wa lai sa galaw nga ai lam maw n tsa hkan du hkra Ka-ni lu sha jai lang ai lam galaw ai majaw shani chying tung aten hkan raitim Tsi Rung Lam braw sa lam hkan marai langai hkrai lai wa lai sa galaw na matu pyi myit tsang ra ai madang byin nga ai re.

Ya aten Jinghpaw Mung KIO uphkang ginra kata hkan gaw Ka-ni nanghpam hpe Hpyen madung langai hku masat nna htim gasat nga ai hta PJS magam bungli hpe Ginjaw PJS Woi awn ai Policy kata matut manoi galaw nga ai re.

 Lai wa sai June shata laman hta sha pyi KIO uphkang ginra kata Ka-ni Lu sha Jai lang ai ma masha marai (41) hpe lu rim ai hta marai 29 gaw dut hpaga galaw masha ni re hpe mung chye lu ai. KIO gaw Ka-ni lu sha ai masha ni, Tsi hpan amyu myu htuk galaw shapraw ai masha ni hpe madung ahkyak la ai rai nna ginra mahta ai PJS hpung ni hku nna Ningmu jahpaw ai lam ni hpe madung galaw nna PJS bungli shang nga ai re lam chye lu ai.

Myen hpyen dap mungdan daru magam zing madu ai 2021 hpang daw kaw nna muklum mare kaba hkan gaw lit la ai asuya uphkang masa hten za mat ai majaw Ka-ni lu sha dut hpaga galaw ai masha ni hpe ahkyak la ai lam galaw na hta yu shalai taw ai masa re majaw muklum kaba ni hkan Ka-ni nanghpam hpe Jailang dut hpaga lam hpe wang lu wang lang galaw wa ai re hpe mung chye lu ai.

Shiga- Pyilan U