Mytkyina-Mandalay Mawdaw Lam Bai Hpaw Sai Raitim Myen Hpyen Dap Kawn Mawdaw N Kau Sha Shalai Ai Majaw Mawdaw Tsa Lam Naw Chyat Nga Ai Lam

Pajau Media

September 17, 2025

Gasat gala majan a majaw gan pat da ai Myitkyina-Mandalay lam kaba hpe bai hpaw ya sai raitim lam lapran mawdaw nkau hpe sha naw shalai ai majaw Mawdaw Tsa lam chyat nga ai re nga nna mawdaw la ni tsun ai kaw na chye lu ai.

September 16 ya jahpawt daw Myitkyina-Mung Ywar-Mandalay hkawm sa lam shara lahkawng hta gasat gala byin ai majaw Mawdaw lam hpe gan pat da ai rai nna shani daw hta bai hpaw ya ai raitim mawdaw ni hpe sharam nna she shalai ai re lam chye lu ai.

Myitkyina Manmdaw lam mayan hta gasat gala majan jahkring hkring byin nga ai majaw hkrun lam hkawm Mung masha ni hpyen ninggang shatai hkrum ai lam, hkam bawm tam shangun ai lam ni jahkring hkring hkrum sha nga ai majaw grai sadi maja na lam rawt malan hpung maga na tsun da ai re.

Dai sha n-ga Jinghpaw Mung hte Sagaing ginra jarit Bamauk muklum makau mayan hta mung SNA, Myen hpyen dap pawng hpawm dap ni hte Rawt malan hpung ni lapran gasat gala majan laja nga ai rai nna Myen hpyen dap maga na nbungli bawm dingsa gasat ai lam matut manoi galaw nga ai re lam chye lu ai.

Shiga - Hpring