N Dai Laman Asak Kaji Ai Ma Ni Hka Lim Si Manghkang Jahkring Hkring Ngu Na Daram Byin Ai Lam

Pajau Media Channel

15th April, 2024

Ginhtawng aten ladaw hta asak kaji ai ma ni gaw ni nawn ai hka ni hkan sa shin hkawm ai hta n myit mada hka lim si ai lam ni n dai laman Jinghpaw mung ginra n kau hta byin law nga ai lam chye lu ai.

April (14) ya shana daw hkying (4:00) PM grup yin hta Danai ginra, Nambyu Hka de ma marai (5) gaw hka sa shin ai kaw hka lim si mat ai lam nga ai. Hka lim si ai marai (5) kaw nna marai (4) a moi mang hpe sha lu la ai re hte mum kasha langai a moi mang hpe naw hkan tam nga dingyang re nga nna Danai ginra masha langai tsun ai.

“Nambyu hka kaw ma ni dingyang na hka shin ai shara gaw re, Nambyu hka gaw mi kaw na mung ja ni htu sha ai re majaw hka mut ai. Kade ram sung ai n sung ai ngu mung nchye yu, num kasha ni gaw bai rai hka atsawm n chye hpung yawt ai hta ya na zawn lim si mat ai re. Num kasha langai na moi mang hpe gaw naw tam nga dingyang re” nga nna Danai ginra mung masha langai Pajau media de tsun ai re.

Ginhtawng gahtet ai majaw hka shi hka nu hte ni ai ginra hkan na ma ni law malawng gaw hka hkan sha ginsup chyai hka shin rai galaw nga ai masa hta kanu kawa ni kawn mung ma ni hpe atsawm nlu yu gawn hkang ai majaw mung rai na re. Nambyu hka kaw ya na zawn marai (5) ting kalang ta asak si sum ai gaw shawng de n byin ga yu shi ai hte grai myit npyaw myit tsang hpa re nga nna mung matut tsun ai re.

“Grau nna gaw Myo mare kaba hte tsan ai ginra mung re majaw kanu kawa ni mung bungli galaw sha, tinang a kashu kasha ni hpe yu gawn hkang na aten nlu ai masa byin ai re. Ma ni hka lim si ai manghkang gaw law malawng ginhtawng aten ladaw hta byin law ai. Ginhtawng ladaw hka hkyet ai re majaw ma ni mung sadi maja lam yawm ai, anhte kanu kawa ni mung n dai zawn re ai mabyin yawm hkra yu reng ra sai” nga na tsun ai.

Asak si sum mat ai ma ni gaw Shayi.Lahpai Ja Seng Tawng asak (9) ning, Shayi Lahpai Ja Htoi Pan asak (13) ning, Shayi Lakri Roi Awng asak (12), Shayi Pawm Ja Seng Mai asak (7) ning hte Shayi Lamya Nu Nu Mai asak (11) ning ni re hte Shayi Lakri Roi Awng a moi mang hpe gaw naw tam nga dingyang re. April (13) ya shani hta mung Nambyu Hka kaw asak (10)ning re ai ma langai mung lim si mat ai re hpe mung sagawn chye lu ai. Asak si sum mat ai ma marai (5) gaw Danai Kinsara ST. Joseph Catholic hpyen yen camp kaw nga lai wa nna ya aten Danai ginra kata Ngwi Pyaw mare nnan de htawt sit hpyen yen nga ai re lam, ma ni a moi mang hpe April (16) ya shani makoi na re hpe mung chye lu ai.

N dai zawn re ai mabyin sha n dai laman jinghpaw mung ginra n kau hta mung byin nga ai hta Mohnyin ginra Nam Yin hka kaw lai wa sai April 10 ya shani hta asak (7,8) ning re ai ma lahkawng hka shin sa ai kaw hka lim si mat ai sha n-ga Waimaw Nawng Chying Nyawng Pin Tar ginra kaw April 8 ya shani lani mi kaw sha asak (10) ning n pu ma marai (3) hka lim si ai mabyin mung nga lai wa sai re lam chye lu ai. Hka lim si ai ma law malawng gaw asak (10) ning npu ma ni hkrai re lam mung sagawn chye lu ai.

Shiga - Hugawng