N dai laman myitkyina ginra kata masha rim woi mat ai lam ni shiga grai mawng nga ai re majaw hkawm sa hkawm wa lam hta sadi maja ra nga ai shiga

N dai laman Myitkyina muklum shara shagu hta Myen hpyen dap hpung ni gaw aten ntam hkawm sa hkawm wa mung masha ni hpe san jep ai lam ni nga ai sha n-ga, ginra kata masha rim hkrum ai lam ni shara shagu hta byin nga ai lam shiga ni grai mawng nga ai re majaw Myo kata shanu nga ai mung masha ni grai hkrit tsang let sha hkawm sa nga ra ai re lam ginra masha ni tsun ai.

Myen hpyen gumshem dap mungdan Uphkang wa ai hpang kaw nna mara kata mung masha ni hpe rim woi mat ai lam ni dingyang byin nga ai re.

Myitkyina ginra kata shana hkying (10:00)Pm kaw nna jahpawt (4:00) Am du hkra pru hkawm ai lam ni n galaw na matu ndau da ai lam ni nga ai re,raitim ramma n kau gaw pru hkawm ai majaw rim hkrum ai lam ni nga ai hte Gumhpraw law law jaw nna bai shaw la ai lam, lai wa sai bat laman hta byin lai wa sai lam Myitkyina ginra masha langai tsun ai hta

 “ anhte ramma ni mung grai ra ai, HKying shi hta n mai pru ai lam n dau da tim pru ai, lai wa sai Bat laman hta sha Mawdaw Lam maw kaba hkan shana hkying 10 hpang daw hta mawdaw gau lai hkawm lam ni galaw ai majaw rim katut sai gaw, hpang daw ngai bai shagawn yu yang marai langai Sen (20) daram jaw nna bai shaw la ai lam sagawn chye lu ai ” nga nna tsun ai re.

Ginra masa lam gaw grai naw shuk shanut nga ai aten nten n man ai shiga ni mawng ai lam grai law nga ai re, n dai laman hta Myitkyina Shwe Zet,Man Hkring,Du kahtawng lawk ni hkan gara uhpung re mying n chye lu ai hpung ni kawn shana hkying jahku ram hta hkawm sa hkawm wa ramma ni hpe san jep rim ai lam ni, Myitkyina Masat (1), Masat (3) jawng ni hta Jawng ma ni hpe rim woi mat ai lam nga ai nga nna , shiga grai brawng nga ai re hte bai sagawn yu yang nteng n man ai shiga ni byin nga ai re lam sagawn chye lu ai.

Ya na masa hta shiga ni hpe grai jen jep nna madat ra ai lam Mare Uphkang salang Usa langai tsun hpaji jaw da ai kaw na chye lu ai.

Ta tut hta mung Myo mare kaba ni hta hkawm sa hkawm wa mung masha ni hpe san jep rim ai lam ni gaw nga ai re, Na lu ai shiga ni hta Myitkyina ginwang kata Myen hpyen Dap kawn n dau da ai hta shana aten lai pru hkawm ai Mung shawa kadai hpe raitim sinat hte gap na re lam, Mare uphkang salang ni hpe tsun shana wa ai lam nga ai nga nna shiga ni brawng taw ai re majaw Myo mare hta mung masha ni hkawm sa hkawm wa grai sadi maja let hkawm sa ra ai lam lit nga mare uphkang salang ni tsun da ai hpe chye lu ai.