N Dai Laman Myitkyina Muklum Kata Masha Rim Ai Lam Jahkring Hkring Byin Nga Ai Lam

Pajau Media Channel

27th March, 2024

Myitkyina muklum kata lam ntsa hkan cycle hte hpawng chyawm nga ai zawn re ai ni hte seng dung ai aten rim hkrum ai lam ni n dai laman hta jahkring hkring byin nga ai majaw ginra masha ni myit tsang nga ma ai re.

Myen mungdan kata ginra shara shagu hta mung Myen hpyen dap a shagrin dat ai Upadi hpe hkrang shapraw galaw nga ai aten mung re majaw ladat amyu myu hte masha lahkawn nga ai aten mung re. Mungdan ting gaw Myen hpyen dap hpe rawt malan nga ai aten hta Myen hpyen dap kawn mungdan masha shagu hpyen la galaw na matu hkrang shapraw galaw wa ai hte mungdan kata nga rawt malan hpung ni kawn mung rawt malan ginra de lawan ladan shang wa na matu saw shaga nga ai aten mung re.

March 26 ya shani hta mung Myitkyina Shatapru lawk Bum Noi lu sha seng kaw seng dung nga ai ramma ni hpe mying n chye lu ai hpung ni kawn mawdaw lahkawng hte rim woi mat ai re lam ramma langai tsun ai hta “Seng Mun Mai hte Mung Hpan yan lahkawng hpe sha chye ai, kaga ni gaw shan lahkawng na manang ni mai byin ai, marai kade lawm mat ai gaw tup hkrak n lu tsun ai, ramma marai (5) a lahta gaw re” nga nna ginra masha ni tsun ai.

N dai mabyin zawn sha shana hkying (7:00) pm aten daram hta mung Du Kahtawng Lawk (3) Shwine Made kara zen seng kaw na ramma lahkawng hpe mung mying n chye lu ai hpung ni kawn rim woi mat ai hte lai wa sai March (18) ya shani hta mung amyu shayi marai (3) lam lapran kaw mat mat ai lam nga ai re hte dai kaw na marai (1) gaw lawt wa ai, marai (2) gaw naw mat nga ai re hpe mung chye lu ai.

Myitkyina Muklum hta ya na zawn masha mat ai lam jahkring hkring byin nga ai raitim kadai gara uhpung ni rim woi mat ai re ngu hpe gaw tup hkrak nchye lu ai sha n-ga matut mahkai mung nlu ai lam tsun nga ma ai re. Ya aten myen hpyen dap maga kawn hpyen magam gun na lam hte seng nna masha lahkawn dingyang re hte mare uphkang salang ni kawn mung lam ntsa hkan pru hkawm ai ramma ni hpe rim na matu aming jahkrat da ai lam ni nga ai majaw n dai masa kata hta mung masha ni grai myit tsang nga ma ai re hpe mung chye lu ai.