N dai Shata Laman Langse Ginra Maga Myen Hpyen Dap hpyen Shamu Wa Ai Lam

Pajau Media

July 18.2025

Hkawng Lang Hpu P.T.Ts. hte Myen Hpyen Dap pawng hpawm hpung ni gaw lai wa sai June shata ram kaw nna Hkawng Lang Hpu maga de hpyen n gun jat ai lam galaw ai hte July shata kaw nna hkawng Lang Hpu hte Langse ginra lapran shamu shamawt ai lam ni galaw wa ai re hpe mung chye lu ai.

Lang se ginra hpe tat sum kau ai hpang kaw nna Hkawng Lang Hpu maga de hpyen n-gun tsa lam bai jahting da nna July shata laman KIA pawng hpawm hpung ni zing madu da ai shara makau mayan hkan hpyen shamu Hkawm nga ai re lam chye lu ai.

Ya na zawn hpyen shamu shamawt wa ai majaw n dai shata laman sha Langse Ginra makau Lar Hu Se KIA pawng hpawm hpung ni zing madu da ai shara de htu shadut shamu shamawt wa ai Hkawng Lang Hpu P.T.Ts ni lapran gasat gala majan byin ai lam nga ai re hpe Mung chye lu ai.

Myen Hpyen Dap pawng hpawm hpung ni gaw Jinghpaw Mung kata n hprang sut rai pru ai shara ni hpe masat shingte tawn nna htim gasat ai lam grau galaw wa ai re. Myen Hpyen Dap kawn mung Tang Gu Tang woi awn ai P.T.Ts hpung ni hpe tat kau sai Langse ginra hpe htim gasat na matu n bungli hku nna lak nak htaw shalai garum nga ai lam gang hkau shiga ni kaw na chye lu ai.

Dai zawn sha Langse Ginra mung ja grai pru ai shara re lam mying gumhkawng ai majaw dai shara hpe bai lu la hkra htim gasat na matu hkyen wa ai re lam mung masa maram masam nga ai ni tsun ai re.

Langse Ginra hpe lai wa sai 2024 October shata daram hta KIA pawng hpawm hpung ni htim gasat zing madu la ai re. N dai laman Myitkyina-Putao lam Sumpra Bum Ginra de July 16 ya hta mung mung Tang Hpare kaw dung ai Myen Hpyen Dap kasu hkawm ai lam nga ai re hpe mung chye lu ai.

Putao Lam Sumpyi Yang Ginra, Lung Sha Yang ginra hkan mung Myen Hpyen dap hpyen n -gun jat shamu hkawm ai lam dingyang galaw nga ai re hpe mung chye lu ai.

Shiga. Pyilan U