Nam Maling Kata Koi Yen Nga Ai Nam Ya Ginra Masha Ni Hpe Shara Bai Htawt Sit Ai Lam

Pajau Media

July 7, 2025

Myen hpyen dap hte Rawt malan hpung ni lapran gasat gala majan laja ai majaw Nam maling kata koi yen nga ai Nam Ya hpyen koi yen mung masha ni hpe shara htawt sit masat ya lu sai lam chye lu ai.

“ 2025 April daram kaw nna July 2 ya du hkra Nam maling, Hkau na hte Yi hkan koi yen nga ai Nam Ya ginra masha ni hpe makam masham Nawku hpung Wuhpung Wuhpawng ni hku nna shara htawt sit masat ya ai lam galaw sai” nga nna Nam Ya buga Hkalup hpung kaw na chye lu ai.

Lai wa sai April 24 ya shani kaw nna Myen hpyen dap Hpung ni hpyen n-gun htu shadut wa ai sha n-ga N bungli bawm, Lak nak kaba ni hte gap bun ai majaw KIA pawng hpawm hpung ni lapran gasat gala majan laja wa ai majaw Nam Ya ginra masha ni hte Hpakant lam mayan nga ai Mung masha hkying lam shimlum ai shara de htawt sit nga ai re.

Dai aten kaw nna Nam Ya ginra masha law malawng gaw Hpakant Muklum, Myitkyina Muklum hkan tinang hte ni nawn ai Jinghku nta de koi yen hkawm ma ai re, dai hta n kau gaw Nam maling hkan tinang a mahkrun hte tinang koi yen hkawm ma ai re hpe mung chye lu ai.

Ya aten hta Lit nga ai kawn masat da ya ai shara ni hkan shanu nga ma ai raitim Malu masha tsi mawan ni, Ma kaji ni na matu n-gun rawng ai malu masha garum ningtum lam ni mung ra kadawn nga dingyang re lam hpyen koi yen mung masha ni tsun ai re.

Hpakant ginra gasat gala majan htu shadut wa ai hpang Hpakant lam mayan na Girna masha htingaw 600 jan daram hte Mung masha 3,000 hkawt shanu nga ai Nam Ya mare mung lak nak kaba hkrat bun ai sha n-ga N bungli htim gasat ai lam ni a majaw Dum nta wan hkru hten za ai lam ni law nga ai re lam chye lu ai.

Shiga- Htu Seng