Nam Si Awng Gate Kaw PSMS System Hte Mung Chying Masat Jep Nna CDM Marai 3 Rim Hkrum Ai Lam

Pajau Media

10th September, 2025.

Myen hpyen dap gaw Nam Si Awng Gate kaw September 9 ya shani PSMS system hte mung chying masat jep ai hta CDM marai (3) hpe lu rim ai lam dai gate hte ni nawn ai masha ni kaw na chye lu ai.

Rim hkrum ai gaw CDM magam gun marai lahkawng hte hkam ja lam magam gun langai a Madu Wa re lam chye lu ai. Jinghpaw mung kata Nam Si Awng Gate hte Myitkyina deng 21 Gate ni kaw hkrun lam hkawm Mung masha ni hpe PSMS system hte mung chying masat jep joi ai lam laja lana galaw nga ai rai nna Amu manghkang nga ai Mung masha ni rim hkrum ai lahkawng lang re sai hpe chye lu ai.

Myen hpyen dap gaw May 25 ya hpang daw kaw nna PSMS Software hpe jai lang nna mung chying masat jep joi rim ai lam ni galaw ai rai nna Balik dap hkan mung amu manghkang matsing nga ai ni hte Mung masa hte gindun ai lam nga n nga Person Scrutinization and Monitoring System (PSMS) hte jep joi nga ai re lam chye lu ai.

Dap System hte jep joi ai hta hpa amu manghkang n nga, Mung masa hte gindun ai lam mung n nga ai lam madi shadaw laika pa lawm ai ni hpe du hkra mung chying masat hte shing daw nna jep joi ai re lam chye lu ai.

PSMS (Person Scrutinization and Monitoring System) hte jep joi ai majaw myen mungdan kata rim hkrum ai masha marai (1,650) jan wa sai lam BBC shiga hta tang madun da ai re.

Shiga - Kachin pyi tar